بەشێکی گرنگی وێستگەی ئاوی ئیفراز سێ نۆژەنکرایەوە

ئاڤا نیوز

تیمەكانی ئاو و ئاوەڕۆی هەولێر، دەستیانكرد بە جێبەجێكردنی پرۆژەیەكی گرنگ لە وێستگەی پاڵاوتنی ئاوی ئیفراز سێ كە زامنی پاراستنی وێستگەكە دەكات لە مەترسیی جۆراوجۆر.

بۆچی گرنگە: بەهۆی هەستیاریی غازی كلۆر كە لە خاوێنكردنەوەی ئاوی خواردنەوە بەکاردەهێنرێت، پێویستە لە شوێنێكی سەلامەت و دوور لە بەركەوتنی بە هەر ماددەیەكی دیكە هەڵبگیرێت و کۆگا بكرێت، بۆ ئەمەش دووبارە نۆژەنكردنەوەی گۆڕەپانی هەڵگرتنی گازی كلۆر لە وێستگەی ئاوی ئیفراز سێ، پێویست بوو.

لێدوانی فەرمی: ئەندازیار ڕابەر حوسێن، بەڕێوەبەری ئاو و ئاوەڕۆی هەولێر، تایبەت بە ئاڤا ڕایگەیاند، لەسەر بودجەی تەنگەتاوی پارێزگای هەولێر، تیمەكانمان دەستیانكرد بە خاوێنكردنەوە و پڕكردنەوە و كۆنكرێتكردنی گۆڕەپانی غازی كلۆر لە وێستگەی پاڵاوتنی ئاوی ئیفراز سێ بەشێوەیەكی ستاندارد، كە پێشتر بەشێوەیەكی نائەندازەیی دروستكرابوو، بەهۆی داخورانی ئاسن و ماددەی دیكەی بەكارهێنراو، مەترسیی پیسبوون و ڕووداوی نەخوازراوی لێ دەكرا.

زانیاریی زیاتر: بەڕێوەبەری ئاو و ئاوەڕۆی هەولێر ڕوونیشی كردەوە، هەر لەچوارچێوەی پرۆژەكە، دیواری پاڵپشتی لە وێستگەی پاڵاوتنی ئیفراز سێ دروستكرا، لەپێناو ئەوەی هیچ ماددەیەك نەچێتە ناو غازی كلۆرەوە.

ئەوەش بزانە: ئەندازیار ڕابەر حوسێن باسی لەوەشكرد، شوێنی كۆگای گازی كلۆر لە هەردوو وێستگەی ئاوی ئیفرازی یەک و دوو، كۆنە و پێویستی بە نۆژەنكردنەوە هەیە، لە ئاییندەیەكی نزیكدا ئەوانیش نۆژەن دەكرێنەوە.

باكگراوند: پڕۆژەی ئاوی ئیفراز سێ لە ساڵی 2007 بونیادنرا، بەر لە پرۆژەی فریاكەوتنی خێرای ئاوی هەولێر، سەرچاوەی سەرەکیی ئاوی نزیکەی 40 گەڕەکی شاری هەولێر بوو، کە دەکاتە 40%ـی دانیشتووانی شارەکە.