وەزارەتی ناوخۆی عێراق هێزە ئەمنییەکان دەخاتە بەرزترین حاڵەتی ئامادەباشییەوە

ئاڤا نیوز


بەمەبەستی پاراستنی ئاسایشی هەڵبژاردنی پەرلەمان، وەزارەتی ناوخۆی عێراق حاڵەتی ئامادەباشی لە سەرجەم پارێزگاکاندا بۆ ئاستی "ج" بەرز دەکاتەوە، کە ئەمەش بەرزترین ڕێکاریی ئەمنییە کە بگیرێتە بەر. 

وێنە گەورەکە: بڕیارە هەڵبژاردنی پەرلەمانی عێراق 11-11-2025 بەڕێوەبچێت، بۆ ئەو هەلبژاردنەش 21 ملیۆن و 404 هەزار و 291 کەس مافی دەنگدانیان هەیە، زیاتر لە حەوت هەزار کاندیدیش کێبڕکێ لەسەر 329 کورسییەکەی پەرلەمان دەکەن. 

لێدوانی فەرمی: عەمید میقداد میری، سەرۆکی فەرمانگەی پەیوەندییەکان و ڕاگەیاندن لە وەزارەتی ناوخۆی عێراق ڕایگەیاند: لەڕۆژانی دەنگدانی تایبەت هەموو هێزە ئەمنییەکان لەسەر ئاستی وڵاتدا دەخرێنە ئامادەباشییەوە و حاڵەتەکەش بۆ ئاستی "ج" بەرز دەکرێتەوە.

- نزیکەی 185 هەزار ئەفسەر و کارمەند لە پاراستنی زیاتر لە حەوت هەزار بنکەی هەڵبژاردن بۆ دەنگدانی گشتی و نزیکەی 600 بنکە بۆ دەنگدانی تایبەت بەشدار دەبن.

- سەرۆکی فەرمانگەی پەیوەندییەکان و ڕاگەیاندن لە وەزارەتی ناوخۆی عێراق جەختی لەوەش کردەوە، کە هیچ بڕیارێک بۆ قەدەغەکردنی هاتووچۆ لە ماوەی هەڵبژاردنەکاندا نییە، بۆ دڵنیابوونیش لە بەڕێوەچوونی پڕۆسەی هەڵبژاردن بە شێوەیەکی پارێزراو و بێ گرفت، چالاکییە ئەمنییەکان لە سنوورەکانەوە تا ناوەندی شارەکان دەستپێدەکەن.