وەزیری دەرەوەی ئێران: ئامادەی هەر هێرشێکی لەناکاوی ئیسرائیلین

ئاڤا نیوز

وەزیری دەرەوەی ئێران دەڵێت: ئامادەی هەر هێرشێکی لەناکاوی ئیسرائیلین و دڵنیاین گەر هێرش بکات دووبارە شکست دەهێنێت.

وێنە گەورەکە: لەدوای شەڕی 12 ڕۆژەی نێوانیان، ئیسرائیل و ئێران بەتایبەت ئێران لە ئامادەکاری تەواودان بۆ هەر هێرشێکی چاوەڕواننەکراو بۆ سەر یەکتر.

لێدوانی فەرمی: عەباس عێراقچی، وەزیری دەرەوەی ئێران دەڵێت: چاوەڕوانی هەر ڕەفتارێکی دوژمنکارانە و هێرش لە ئیسرائیل دەکەین، دڵنیایش دەدەین هەر هێرشێکی نوێ بکرێت، ئیسرائیل تووشی شکستێکی دیکە دەبێت، شەڕی ئەم دواییە دەرفەتێک بوو بۆ تاقیکردنەوەی مووشەکەکانی ئێران بە کردەوە.

زانیاریی زیاتر: دەربارەی دانوستانەکان لەگەڵ ئەمریکا، وەزیری دەرەوەی ئێران گوتی: ئێمە ئارەزووی دانوستانی ڕاستەوخۆمان لەگەڵ ئەمریکادا نییە و دەتوانین لە ڕێگەی دانوستانی ناڕاستەوخۆ بگەینە ڕێککەوتن، ناتوانین پیتاندنی یۆرانیۆم بوەستێنین، "ئەوەی لەڕێگەی شەڕەوە بەدەست نەهێنرێت، ناتوانرێت لەڕێگەی سیاسەتەوە بدرێت" ئێمە تەنیا بیر لە پەیوەندییەکانمان لەگەڵ دراوسێکانمان دەکەینەوە و دەمانەوێت گەشە بە پەیوەندییەکانمان لەگەڵ دراوسێکانمان بدەین.