کۆمپانیای سۆمۆ: ڕێککەوتنی هەولێر و بەغدا لەبارەی نەوت و مووچە سێ مانگ درێژ كراوەتەوە

ئاڤا نیوز

ڕێککەوتنی نێوان هەولێر و بەغدا لەبارەی پرسی مووچە کۆتایی ئەمساڵ تەواو دەبێت، جێگری بەڕێوەبەری کۆمپانیای سۆمۆ دەڵێت، 'ڕێککەوتنەکە بۆماوەی سێ مانگی دیکە درێژ کراوەتەوە'.

وێنە گەورەکە: ڕێککەوتنی هەولێر و بەغدا لەبارەی مووچە چەند بڕگەیەک لەخۆدەگرێت، لەوانە؛ هەناردەکردنی نەوت و فرۆشتنی لەڕێگەی کۆمپانیای سۆمۆی عێراق، ناردنی 120 ملیار دیناری داهاتی نانەوتی، ناردنی لیستی مووچە و ڕاپۆرتی میزان موراجەعە لەلایەن حکومەتی کوردستان، لە بەرامبەردا بەغدا کۆتایی هەموو مانگێک مووچە بنێرێت.

لێدوانی فەرمی: حەمدی شنگالی، جێگری بەڕێوەبەری کۆمپانیای سۆمۆ بە ئاڤای وت: بۆ ماوەی سێ مانگی دیکە ڕێککەوتنی نێوان حکومەتی هەرێمی کوردستان و حکومەتی فیدراڵ نوێکراوەتەوە، واتە تاوەکو 31-3-2026.

جێگری بەڕێوەبەری کۆمپانیای سۆمۆ ئاماژەی بەوەشدا، لەسەر بابەتی نەوت کێشەیان لەگەڵ وەزارەتی دارایی عێراق نییە.

زانیاریی زیاتر: بەگوتەی شنگالی، تێچووی بەرهەمهێنانی نەوت بەهۆی دژواری شوێنی کێڵگەکان لە هەرێمی کوردستان بەرزە، بۆیە 16 دۆلار بۆ تێچووی بەرهەمهێنان و گواستنەوەی دانراوە.

ئاماژەی بەوەشکرد، هەرێمی کوردستان ڕۆژانە 200 بۆ 250 هەزار بەرمیل نەوت هەناردە دەکات.

خاڵی ئەرێنی: ئەگەر هەولێر و بەغدا بە ڕێککەوتنەکە پابەند بن، ساڵی داهاتوو کێشە بۆ ناردنی مووچەی خەڵکی کوردستان دروست نابێت تا بودجەی ساڵی 2026 ئامادە و پەسەند دەکرێت، ئەوکاتیش بودجە بۆ هەرێمی کوردستان دەنێردرێت نەوەک تەنیا مووچە.

باکگراوند: ڕۆژی 22-9-2025، ڕێککەوتنی سێقۆڵی نێوان وەزارەتی سامانە سرووشتییەکانی کوردستان و کۆمپانیای نەوتی باکوور و کۆمپانیاکانی نەوت بۆ هەناردەکردنی نەوتی کوردستان واژۆکرا، بەرەبەیانی ڕۆژی 27-9-2025 هەناردەکردنی نەوت بۆ بەندەری جەیهانی تورکیا دەستیپێکردەوە، هەمان ڕۆژ وەزیری نەوتی عێراق هەناردەکردنی نەوتی هەرێمی کوردستانی ڕاگەیاند.