نێچیرڤان بارزانی: ناوچەگەرێتی لای پارتی شوێنی نابێتەوە و ڕەتی دەکەینەوە

ئاڤا نیوز

نێچیرڤان بارزانی، لە بانگەشەی پارتی بۆ هەڵبژاردنی پەرلەمانی سلێمانییەوە چەند پەیامێکی ئاڕاستەی خەڵکی کوردستان کرد و ڕایگەیاند: خەمی خەڵکی پارێزگاکانی سلێمانی و هەڵەبجە خەمی پارتییە.

چیرۆکی سەرەکی: ئەمڕۆ یەکشەممە، بە ئامادەبوونی نێچیرڤان بارزانی، جێگری سەرۆکی پارتی دیموکراتی کوردستان، کەرنەڤاڵێکی جەماوەری گەورە بۆ پشتگیری لە لیستی 275 پارتی و ناساندنی  36 کاندیدی بازنەی سلێمانی بەڕێوەچوو. 

پەیامی فەرمی: نێچیرڤان بارزانی، جێگری سەرۆکی پارتی دیموکراتی کوردستان ڕایگەیاند: خەمی خەڵکی پارێزگاکانی سلێمانی و هەڵەبجە خەمی پارتییە، خەڵکی ئەم ناوچەیە خاوەنی پارتین، پارتیش خاوەنی ئێوەیە.

لە بەشێکی دیکەی قسەکانی نێچیرڤان بارزانی ڕایگەیاند: ناوچەگەرێتی لای پارتی شوێنی نابێتەوە و ڕەتی دەکەینەوە و لای پارتی ئەو بابەتە نەماوە و نامەوێت شتێک بمێنێت بەناوی زۆنی سەوز و زۆنی زەرد، بەڵکو دەبێت یەک زۆنمان هەبێت کە ناوی زۆنی کوردستان بێت.

"پارتی لە هەرکوێ بێت ئاوەدانی و خزمەت زیاتر دەبێت، بە هەموو دەستکەوت و خزمەتگوزارییەکان لە هەرکوێ بێت دڵخۆش دەبین، نامانەوێت جیاوازی لە هیچ کوێیەک بکرێت."

نێچیرڤان بارزانی لە وتارەکەیدا ئەمانەشی وت:

٠ داواکاریی خەڵکی سلێمانی، هەڵەبجە، گەرمیان و ڕاپەڕین ئەرکی سەر شانمانە.

٠ دەمانەوێت دەنگی پارتی لەم ناوچەیە زیاد بکەین.

٠ پارتی لە هەر کوی بێت ئاوەدانیی زیاتر دەبێت.

٠ پارتی بڕوانامەی ئاوەدانیی لە خەڵکی کوردستان وەرگرتووە.

٠ هەموومان قەرزاری سلێمانین.

٠ سلێمانی شاری وزە و دەستپێشخەرییە.

٠ لەم دەڤەرە دژایەتیی زۆری پارتی کراوە.

٠ پارتی ڕۆژ بە ڕۆژ لە سلێمانی خۆشەویستر دەبێت.

٠ پارتی هێزی ڕاستەقینە و سەنگی کوردستانە لە بەغدا.

٠ پارتی دەیەوێت حکومەتی عێراق دەستوور جێبەجێ بکات.