مەسرور بارزانی وەڵامی بافڵ تاڵەبانی دەداتەوە و باسی هێرشکردنە سەر لالەزار دەکات بە تۆپ و تانک

ئاڤا نیوز

مەسرور بارزانی لە بانگەشەی هەڵبژاردنی پارتی پەیامێکی ئاراستەی خەڵکی کوردستان کرد و ڕایگەیاند، ئەوانەی داوای ئازادی دەکەن دەبێت خۆیان خاوەن بڕیاری خۆیان بن، ئازادی ئەوەیە بۆ کوردستان تێبکۆشیت نەک بە تۆپ و تانک بچیتە سەر هۆتێلێک.

چیرۆکی سەرەکی: مەسرور بارزانی، جێگری سەرۆکی پارتی دیموکراتی کوردستان، لە کەرنەڤاڵی جەماوەری بۆ پشتگیری لە لیستی 275ـی پارتی لە شەقڵاوە وەڵامی قسەکانی ڕۆژی ڕابردووی بافڵ تاڵەبانی، سەرۆکی یەکێتیی نیشتمانیی کوردستانی دایەوە کە لە بانگەشەی حیزبەکەی گوتبووی، " هەولێر باڵەخانە و شەقامی فراوانی بۆچییە کە ئازادی تێدا نەبێت".

پەیامی فەرمی: مەسرور بارزانی لە کەرنەڤاڵە جەماوەرییەکەی پارتی ڕایگەیاند: ئەوانەی داوای ئازادی دەکەن دەبێت خۆیان ئازادبن، ئازادیش ئەوەیە بۆ کوردستان تێبکۆشیت نەک بە تۆپ و تانک بچیتە سەر هۆتێلێک.

لە بەشێکی دیکەی قسەکانیدا مەسرور بارزانی باسی لەوەشكرد: حکومڕانی بە کەسی دیکە ناکرێت جگە لە پارتی، چونکە دەبێت ئەوە بزانن ئەوەی ئامادەبووە خاک بفرۆشێت چۆن ئێستا دڵسۆزی خاکەکەی دەبێت؟

٠ لەسەر ئەوەی وتوومانە کەرکووک داگیرکراوە لای خەڵکە شۆڤێنییەکان پەلامار دراوین، دە جاری دیکە دەیڵێینەوە کەرکووک کوردستانە و کەرکووک داگیرکراوە، بە دەنگی خەڵک و جێبەجێکردنی دەستوور کەرکووک و ناوچە دابڕێنراوەکان دەگەڕێنینەوە.

٠ ڕێگریکردن لە پێکهێنانی حکومەتی نوێ دەستکەوت نییە، ئەوانەی دەڵێن ڕێگری لە پێکهێنانی حکومەت دەکەین ئەوانەن کە داوای پۆست دەکەن، دەبێت ئەوە بزانن ئەو لایەنانە بۆ دەستکەوتی تایبەتی و پۆست ڕێگری لە پێکهێنانی حکومەت دەکەن.