ئەو کاندیدەی سکاڵای دژی سوودانی تۆمار کردبوو گەڕێنرایەوە کێبڕکێی هەڵبژاردن

ئاڤا نیوز

دەستەی دادپەوەریی هەڵبژاردنی سەر بە کۆمیسیۆنی هەڵبژاردنەکان بڕیاریدا حوسێن عەرەب، کاندیدی دوورخراوەی هاوپەیمانییەکەی محەممەد شیاع سوودانی، سەرۆکوەزیرانی عێراق بگەڕێنێتەوە نێو کێبڕکی هەڵبژاردن.

چیرۆکی سەرەکی: حوسێن کازم ناسراو بە حوسێن عەرەب بەهۆی ساختەکردنی بڕوانامەی زانکۆ لەلایەن کۆمیسیۆنەوە دوورخرابووەوە، ڕۆژی 1ـی ئەم مانگە، سکاڵای لە کۆمیسیۆنی هەڵبژاردنەکان دژی سوودانی تۆمار کرد گوایە پێگە و سەروەتی دەوڵەتی لە بانگەشە بەکارهێناوە، دواتر گەڕێنرایەوە کێبڕکێی هەڵبژاردن.

نووسراوی فەرمی: دەستەی دادوەریی هەڵبژاردن لە نووسراوێکدا ئاشکرای کردووە، بڕیاری گەڕاندنەوەی حوسێن عەرەب لەبەر ئەوە بووە بابەتی پشتڕاستکردنەوەی ڕەوایەتیی بەڵگەنامەکانی خوێندنی و پەیوەندیکردن بە لایەنی پەیوەندیدار "ڕەنگە کاتێکی زۆر بخایەنێت بەهۆی سرووشتی لێکۆڵینەوەکە"، کە ئەو ڕێکارانە ناکۆکن لەگەڵ نزیکبوونەوەی وادەی دەنگدان.

زانیاریی زیاتر: حوسێن عەرەب لە خولی پێشوو و ئێستا ئەندامی پەرلەمانی عێراق بووە و بۆ ئەم هەڵبژاردنە لەسەر لیستی هاوپەیمانیی "ئاوەدانی و گەشەپێدان" بە سەرۆکایەتیی سوودانی بەربژێر بوو، دوای دوورخستنەوەی و تۆمارکردنی سکاڵای دژی سوودانی، هاوپەیمانیەتییەکە ڕایگەیاند، هیچ پەیوەندییەکی بە ئێمەوە نەماوە.