کۆمسیۆن: سزای پێشێلکردنی قەدەغەی بانگەشەی هەڵبژاردن دەگاتە دوورخستنەوە

ئاڤا نیوز

کۆمسیۆنی باڵای سەربەخۆی هەڵبژاردنەکان هۆشداری دەداتە کاندید و لیستە سیاسییەکان لە پێشێلکردنی قەدەغەی بانگەشەی هەڵبژاردن، جەخت لەوە دەکاتەوە سزاکەی دەگاتە دوورخستنەوەی کاندید لە کێبڕکێی هەڵبژاردن.

وێنە گەورەکە: کۆمیسیۆنی باڵای سەربەخۆی هەڵبژاردنەکانی عێراق ڕۆژی هەینی 3-10-2025، وەک یەکەم ڕۆژ بۆ دەستپێکردنی بانگەشەی هەڵبژاردنی پەرلەمانی عێراق دیاری کرد و بەیانی ڕۆژی شەممە، 8-11-2025  قەدەغەی بانگەشەی هەڵبژاردن دەستپێدەکات.

لێدوانی فەرمی: حەسەن هادی زایر، ئەندامی تیمی ڕاگەیاندنی کۆمیسیۆن، بە ڕۆژنامەی فەرمیی عێراقی ڕایگەیاند، هەر بانگەشەیەک لەم ماوەیەدا پێشێلکارییەکی ڕوونە بۆ ڕێنماییە کارپێکراوەکان و وتی، "پێشێلکردنی قەدەغەی بانگەشەی هەڵبژاردن کاندیدەکە دەخاتە ژێر سزای دارایی یان کارگێڕییەوە بەگوێرەی جۆری پێشێلکارییەکە".

مەترسییە پێشبینیکراوەکان: زایر ڕوونیشی کردەوە کۆمسیۆن لەوانەیە ڕێوشوێنی تووندتر بگرێتەبەر کە دەگاتە دوورخستنەوەی کاندید لە پێشبڕکێی هەڵبژاردن، لە حاڵەتی گەیشتنی پێشێلکارییەکە بە ئاستی تاوانی هەڵبژاردن.

زانیاریی زیاتر: زایر داوای لە هەموو هێزە سیاسییەکان و کاندیدەکان کرد پابەندی قەدەغەی بانگەشەی هەڵبژاردن بن، بۆ ئەوەی کەشێکی گونجاو بۆ ئەنجامدانی دەنگدانێکی دادپەروەر و شەفاف بڕەخسێنن کە ڕەنگدانەوەی ئیرادەی دەنگدەران بێت.

ئەوەی پێویستە بیزانیت: بریارە 11ـی ئەم مانگە هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانیش لە ئامادەکارییەکانی بۆ بەڕێوەبردنی ئەم هەڵبژاردنە بەردەوامە.