پارتی کەرنەڤاڵێکی گەورەی جەماوەری لە دهۆک ئەنجام دەدات

ئاڤا نیوز

بە ئامادەبوونی هەردوو جێگرانی سەرۆکی پارتی، ئەمڕۆ سێشەممە 4-11-2025، کاتژمێر دووی پاشنیوەڕۆ پارتی دیموکراتی کوردستان کەرنەڤاڵێکی جەماوەری بانگەشەی هەڵبژاردن لە دهۆک ئەنجام دەدات.

وێنە گەورەکە: بانگەشەی هەڵبژاردن تەنیا چوار ڕۆژی ماوە، حیزبە گەورەکان نزیک دەبنەوە لەوەی کەرنەڤاڵی جەماوەری بەرفراوان ئەنجام بدەن، لە هەڵبژاردنی ڕابردوو بەشێکی زۆری دەنگەکانی بازنەی دهۆک بۆ پارتی بووە.

لێدوانی فەرمی: نەوزاد عەبدوڵڵا، بەرپرسی لقی یەکی پارتی دیموکراتی کوردستان ڕایگەیاند، پارتی، کەرنەڤاڵێکی جەماوەریی گەورەی بانگەشەی هەڵبژاردن لە دهۆک ئەنجام دەدات، هەردوو جێگرانی سەرۆک بارزانی، نێچیرڤان بارزانی و مەسرور بارزانی ئامادە دەبن. کەرنەڤاڵەکە لە یاریگای تۆپی پێی یانەی دهۆک دەبێت و ئامادەکاریی تەواومان بۆ کەرنەڤاڵەکە کردووە.

بەرپرسی لقی یەکی پارتی دەشڵێت: هەردوو هونەرمەند حەسەن شەریف و ئەلەند حازم، چەند گۆرانییەکی تایبەت پێشکەش بە ئامادەبووان دەکەن. 

ئەوەی پێویستە بیزانیت: پارتی بە لیستی ژمارە 275 لە پارێزگای دهۆک 22 بەربژێری هەیە و کێبڕکێ لەسەر 11 کورسی پارێزگاکە دەکات، لە کاتێکدا لە هەڵبژاردنی ڕابردووی پەرلەمانی عێراق، پارتی هەشت کورسی پارێزگاکەی بەدەستهێنابوو، بۆ ئەم هەڵبژاردنەش  لە پارێزگای دهۆک 778 هەزار و  846 کەس مافی دەنگدانی هەیە.