ئایا پشووی هەڵبژاردن زانکۆ و پەیمانگەکان دەگرێتەوە؟

ئاڤا نیوز

ئەگەرچی وەزارەتی پەروەردە شەش ڕۆژی بۆ ناوەندەکانی خوێندن کردوەتە پشوو، بەڵام هێشتا دیار نییە ئەو پشووە زانکۆ و پەیمانگەکان دەگرێتەوە یان نا. وتەبێژی وەزارەتی خوێندنی باڵا دەڵێت: چاوەڕوانی بڕیاری حکومەتین.

وێنە گەورەکە: لە هەموو هەڵبژاردنێک کۆمسیۆن سوود لە ناوەندەکانی خوێندن وەردەگرێت بۆ بەڕێوەچوونی هەڵبژاردن و بەشێکی زۆریان دەکرێن بە بنکەی دەنگدان، بۆیە لەو ماوەیەدا دەکرێتە پشوو.

لێدوانی فەرمی: عەباس ئەکرەم، وتەبێژی وەزارەتی خوێندنی باڵا و توێژینەوەی زانستی بە ئاڤا میدیای وت، پشووی زانکۆ و پەیمانگەکان لەگەڵ پشووی حکومەتی هەرێمی کوردستانە. حکومەت چەند ڕۆژ پشوو ڕابگەیێنێت هەمان ئەو پشووە زانکۆ و پەیمانگەکانیش دەگرێتەوە.

ئەوەی پێویستە بیزانیت: تا ئامادەکردنی ئەم هەواڵە، حکومەتی هەرێمی کوردستان پشووی ڕۆژانی هەڵبژاردنی بۆ فەرمانگەکانی حکومەت ڕانەگەیاندووە. بەڵام وەزارەتی پەروەردە لە ڕۆژی 6-11 تاوەکو 12-11 بۆ ناوەندەکانی خوێندن کردویەتی بە پشوو.