کۆمیسیۆن: 1800 چاودێری نێودەوڵەتی و ڕۆژنامەنووس ڕووماڵی هەڵبژاردن دەکەن

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق دەڵێت، ناوی 304 چاودێری نێودەوڵەتی و نزیکەی 1500 ڕۆژنامەنووسی ناوخۆیی و نێودەوڵەتی بۆ ڕووماڵکردنی هەڵبژاردنی پەرلەمانی عێراق پەسەند کردووە.

 

وێنە گەورەکە:  بڕیارە ڕۆژی سێشەممەی داهاتوو 11-11-2025، هەڵبژاردنی پەرلەمانی عێراق بەڕێوەبچێت و کۆمیسیۆنیش لە ڕۆژی چوارشەممە 5-11-2025 ـەوە، بە مەبەستی دانانی کامێرا و کەرەستەی لۆجستی و تەکنیکیی تایبەت بە پڕۆسەی هەڵبژاردن ئەو قوتابخانانەی هەڵبژاردنی تێدا دەکرێت، وەردەگرێت، هاوکات لە هەر بنکەیەکی دەنگدان سێ کامێرا و هەر وێستگەیەکی دەنگدان دوو کامێرا بۆ چاودێریکردنی پڕۆسەی دەنگدان دادەنێت.

 

لێدوانی فەرمی: حەسەن سەلمان، ڕاوێژکاری یاسایی کۆمیسیۆن ڕاگەیاند: تا ئێستا 304 کەسایەتیی نێودەوڵەتی وەک چاودێر پەسەند کراون کە بەسەر حەوت باڵیۆزخانە و سێ ڕێکخراو و پەیمانگای نێودەوڵەتیدا دابەش بوون. پێشبینیشی کرد، نوێنەرانی كۆمكاری عەرەبی و نەتەوەیەکگرتووەکان بەشداری لە چاودێریکردنی هەڵبژاردنەکەدا بکەن.

 

لەلایەکی دیکەوە: حەسەن هادی زایەر، ئەندامی تیمی ڕاگەیاندنی کۆمیسیۆن ڕوونی کردەوە، 1350 ڕۆژنامەنووسی ناوخۆیی و 200 ڕۆژنامەنووسی نێودەوڵەتی لە ئاژانس و کەناڵە ئاسمانییە نێودەوڵەتییەکان ڕووماڵی هەڵبژاردنی پەرلەمانی عێراق دەکەن.