کۆمیسیۆن: لەم هەڵبژاردنە مەحاڵە ساختەکاری بکرێت

ئاڤا نیوز

 

کۆمیسیۆنی هەڵبژاردنەکانی عێراق دەڵێت، تەنیا دوای پشتڕاستکردنەوەی کارتی دەنگدان، وەرگرتنی پەنجەمۆری دەنگدەر و دڵنیابوونەوە لەوەی ناوی لە لیستی بایۆمەتری هەیە، هاووڵاتی دەتوانێت دەنگ بدات، ئەوەش هەموو گومانێک لەسەر بوونی ساختەکاری لەم هەڵبژاردنەدا دەڕەوێنێتەوە و مەحاڵە ساختەکاریی بکرێت.

 

وێنە گەورەکە: بڕیارە سێشەممەی داهاتوو کە دەکاتە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، لەم هەڵبژاردنە 21 ملیۆن و 404 هەزار و 291 کەس مافی دەنگدانیان هەیە و حەوت هەزار و 754 کاندیدیش کێبڕکێ لەسەر 329 کورسییەکەی پەرلەمان دەکەن.

 

لێدوانی فەرمی: هادی زایر، ئەندامی تیمی ڕاگەیاندن لە کۆمیسیۆنی هەڵبژاردنەکانی عێراق بە ڕۆژنامەی سەباحی ڕاگەیاندووە، ئێستا ملیۆنێک کارتی دەنگدان ماون تا بەسەر خاوەنەکانیاندا دابەش بکرێن، بەڵام تەنانەت ڕۆژی سێشەممەش کە ڕۆژی هەڵبژاردنە تیمەکانیان لەناو بنکەکانی دەنگدان دەبن بۆ ئەوەی کارتەکان بە دەنگدەران بدەنەوە، چونکە بەبێ ئەو کارتە بەهیچ شێوەیەک هاووڵاتی ناتوانێت دەنگ بدات.

 

دەشڵێت، هاووڵاتی بۆ ئەوەی دەنگ بدات، دەبێت وردبینی بۆ کارتی دەنگدانی بکرێت و پەنجەمۆری لێوەربگیرێت، دواتریش لە لیستی دەنگدەران وردبینی بۆ ناوەکەی دەکرێت، ئەوەش مانای وایە مەحاڵە کارتی دەنگدانی کەسێک لەلایەن کەسێکی دیکەوە بەکاربهێنرێت، تا وردبینییش بۆ دوو هەنگاوی یەکەم نەکرێت ناتوانرێت بەدواداچوون بۆ ناوی کەسەکە لە لیستی دەنگدەران بکرێت، ئەوەش دەرگای هەموو گومانێک بەڕووی ساختەکارییدا دادەخات.