محەممەد حاجی مەحموود: عێراق خاوەنی ئاسمانی خۆی نییە

ئاڤا نیوز

سکرتێری پارتی سۆسیال دیموکراتی کوردستان لە ئاهەنگی بانگەشەی هەڵبژاردنی لیستەکەی بۆ پەرلەمانی عێراق تیشکی خستە چەند تەوەرێکی هەستیار لەسەر دۆخی ئێستای عێراق و هەرێمی کوردستان، ئاماژەی بەوەکرد، عێراق خاوەنی ئاسمانی خۆی نییە.

لێدوانی فەرمی: محەممەدی حاجی محموود، سکرتێری پارتی سۆسیال دیموکراتی کوردستان، ڕایگەیاند، پارتی سۆسیال دیموکراتی کوردستان، 50 ساڵە لە خەبات و تێکۆشان و فیداکاری لە پێناوی گەل و نیشتیمانەکەیدا بێوچان بەردوامە، بەو سەرەوەرییە گەورانەی کە ئەو پارتە بەدەستی هێناوە هەر لە سەرەتا و دروستبوونەوەی شۆڕشەوە بزماری لە تابووتی دووژمن داوە، نزیکەی 20 ساڵە لە پەرلەمانی عێراق بەشدارین، بەڵام تائێستا نەتوانراوە مافی کورد بە تەواوی فەراهەم بکرێت، لەبەر ئەوەی دەستوور وەکو خۆی جێبەجێ ناکرێت.

زانیاریی زیاتر: محەمەدی حاجی محموود، باسی لەوەشکرد، عێراق باسی سەروەری دەکات کەچی هیچ سەروەری نییە، لە شەری ئیسڕائیل و ئێران ڕۆژانە 200 فڕۆکە بە ئاسمانی عێراق دەڕۆیشت کەچی عێراق نەیتوانی یەک مووشەک ئاراستەی ئیسڕائیل بکات، ئێستاش ڕۆژانە فڕۆکەی تورکی و وڵاتانی دیکە بە ئاسمانی کوردستان و عێراق دەڕوات ناوچە کوردستانیەکان بۆردوومان دەکرێت، کەچی عێراق ناتوانێت هەڵوێستی هەبێت، جاران سووریا پشتیوانی عێراقی دەکرد، بەڵام ئێستا لە دەست سوونەیە و پاڵپشتی عێراق نییە، عێراق خاوەنی ئاسمانی خۆی نییە.

سکرتێری پارتی سۆسیال دیموکراتی کوردستان دەڵێت، باشترین چارەسەر بۆ عێراق کۆنفیدڕالییە ئەو کاتە سێ هەرێمی جیاواز دروست دەبێت هەر کەسێک لەناوچەی خۆی حوکمی خۆی دەکات تەنیا سێ وەزارەتی هاوبەش دەبێت، ئەویش وەزارەتی دارایی و وەزارەتی دەرەوە و  بەرگری دەبێت.