ئەنجوومەنی باڵای دادوەری: زیاتر لە 37 هەزار بەندکراو بە یاسای لێبووردنی گشتی ئازادکراون

ئاڤا نیوز

ئەنجوومەنی باڵای دادوەریی عێراق ئامارێکی نوێی بڵاوکردەوە، کە تێیدا ئاماژەی بە ئازادکردنی زیاتر لە 37 هەزار بەندکراو دەکات لەوکاتەوەی یاسای لێبووردنی گشتی کەوتووەتە باری جێبەجێکردنەوە.

وێنە گەورەکە: لەوکاتەوەی یاسای لێبووردنی گشتی چووەتە باری جێبەجێکردنەوە، تاوەکو ئێستا هەزاران بەندکراو سوودمەندبوون لە یاساکە و ئازاد کراون.

ڕاگەیێنراوی فەرمی: بەگوێرەی ڕاگەیێنراوی ئەنجوومەنی باڵای دادوەری، "کۆی گشتی ئەو کەسانەی بەپێی ئەم یاسایە لە زیندان و ناوەندەکانی ڕاگرتن ئازاد کراون گەیشتووەتە 37 هەزار و 253 کەس." هەروەها ئاماژەی بەوەدا "ژمارەی ئەو تۆمەتبارانەی بڕیاری دەستگیرکردن یان بانگێشتکردنیان بۆ دەرچووە، یاخود ئەوانەی بە کەفالەت ئازادکراون و حوکمدراوانی غیابی گەیشتووەتە 150 هەزار و 471 کەس".

ژمارەکان وا دەڵێن: ئەنجوومەنی باڵای دادوەری ئاماژەی بەوەشدا، کۆی گشتی بڕە پارە گەڕێنراوەکان گەیشتووەتە 40 ملیار و 901 ملیۆن و 459 هەزار دیناری عێراقی، لە کاتێکدا کۆی گشتی بڕە پارە گەڕێنراوەکان بە دۆلار گەیشتووەتە 34 ملیار و 347 ملیۆن و 414 هەزار دۆلار.

ئەوەی پێویستە بیزانیت: ئەم ئامارەی ئەنجوومەنی باڵای دادوەری لە کاتێکدایە، دوێنێ ئەحمەد لوعەیبی، وتەبێژی وەزارەتی داد بە ئاژانسی هەواڵی عێراقی ڕاگەیاندبوو، "ژمارەی ئەو کەسانەی بەهۆی یاسای لێبووردنی گشتییەوە ئازادکراون گەیشتووەتە 10 هەزار و 213 کەس، لە سەرەتای جێبەجێکردنی یاساکەوە تاوەکو 1ـی تشرینی دووەمی ئەمساڵ."

باکگراوند: ڕۆژی 18ـی شووباتی 2025، هەر سێ یاسای لێبووردنی گشتی و باری کەسی و گەڕانەوەی موڵک بۆ خاوەنە ڕەسەنەکانیان لە ڕۆژنامەی "وەقائیع" بەفەرمی بڵاو کرایەوە، بەمەش هەر سێ یاساکە کەوتنە باری جێبەجێکردنەوە.