دارایی عێراق بۆ هاووڵاتییان: چاوەڕێی دامەزراندن مەبن

ئاڤا نیوز

وەزارەتی دارایی عێراق، هەموو ئەو دەنگۆیانەی ڕەتکردەوە کە باس لە دامەزراندن و پلەی وەزیفی نوێ دەکەن و دەڵێت: "هیچ دەسەڵاتێک بۆ دامەزراندنی کارمەندی نوێ لە دەرەوەی یاسای بودجەی گشتیی نییە".

چیرۆکی سەرەکی:  چەند ڕۆژێکە دەنگۆی دامەزراندنی نوێی ژێر بەژێر بەڕەزامەندی وەزارەتی دارایی عێراق لە بەشێک لە دەزگاکانی ڕاگەیاندن و تۆڕە کۆمەڵایەتییەکان بڵاوبووەتەوە، لەکاتێکدا بەفەرمانی سوودانی سەرۆکوەزیرانی عێراق هەموو جۆرە دامەزراندن و گواستنەوە و پلە بەرزکردنەوەی فەرمانبەران ڕاگیراوە.

ڕاگەیێنراوی فەرمی: وەزارەتی دارایی عێراق ڕایگەیاند:  ئەوەی لە هەندێک لە دەزگای ڕاگەیاندن و تۆڕە کۆمەڵایەتییەکاندا بڵاوبووەتەوە سەبارەت بە دامەزراندن یان تەرخانکردنی پلەی وەزیفی نوێ دوورە لەڕاستییەوە و هیچ دەسەڵاتێکیش بۆ دامەزراندنی ژمارەی نوێ یان ترخانکردنی پلەی وەزیفیی زیادە لە دەرەوەی یاسای بودجەی گشتی نییە.

زانیاریی زیاتر: دارایی عێراق ڕوونیشی کردەوە، جگە لە 150 هەزار پلەی وەزیفی کە بەپێی ژمارەی دانیشتوانی هەر پارێزگایەک دابەشکراون، هیچ لایەنێکی حکومی بۆی نییە گرێبەستی نوێ لەگەڵ هیچ فەرمانبەرێک بکات.