پزشکیان: ئەگەر باران نەبارێت، دەبێت لەبەر بێئاوی تاران چۆڵ بکرێت

ئاڤا نیوز

مەسعود پزیشکیان، سەرۆک کۆماری ئێران، لە میانەی سەردانەکەیدا بۆ پارێزگای سنەی ڕۆژهەڵاتی کوردستان، لەگەڵ بەرپرسان و کەسایەتییەکان و چینە جیاوازەکانی سنە کۆبوویەوە، دواتر باسی لەوە مەترسییانە کرد کە بەهۆی کەمئاوییە ڕووبەڕووی بەشێک لە شارەکان بووەتەوە. 

چیرۆکی سەرەکی: پزیشکیان لە وتارێکیدا بەڵێنی هاوکاری بە خەڵکی پارێزگاکە دا و هاوکات ڕایگەیاند: بەشێک لە کێشەکان گەورەن و هەموو ئێران و بە تایبەت تارانی گرتووەتەوە.

لێدوانی فەرمی: پزیشکیان سەبارەت بە قەیرانە ژینگەییەکانی ئێران گوتی: "ئەگەر باران نەبارێت، ئەوا ئێمە لە تاران، لە مانگی ئازەر (نۆڤەمبەر – دیسەمبەر)، دەبێت ئاو بکەینە کۆبۆن. هێشتاش دیار نییە، ئەگەر بیشیکەین بە پشک و هێشتاش باران نەبارێت، ئەوا ئاومان هەر نابێت. دەبێت تاران چۆڵ بکەن."

زانیاریی زیاتر: لە ئەنجامی سەردانەکەی و کۆبوونەوەی لەگەڵ ئەنجوومەنی پارێزگای سنە، 35 پڕۆژە بە بەهای 25 هەزار ملیار تمەن پەسەند کران. 

ئەمەش بزانە: پزیشکیان لە وەڵامی داواکارییەکانی خەڵکی پارێزگاکە بۆ گەشەدان بە بازرگانی، کشتوکاڵ و پیشەسازی بەڵێنی دا کە هەر ئاستەنگێک هەبێت و هۆکارەکەی حکومەت بێت، ئەوان ئەوان لای دەبەن.