کارەبای چەند گەڕەکێکی سلێمانی پچڕا

ئاڤا نیوز

 

بەهۆی بارانبارین ژمارەیەک فیدەری کارەبای سلێمانی دووچاری شۆرت بوون و بەهۆیەوە کارەبای چەند گەڕەکێک کوژاونەتەوە.

 

وینە گەورەکە: ساڵانە لەگەڵ یەکەم بارانبارین گرفتی تەکنیکیی سەر تۆڕەکانی کارەبا دەردەکەون، شەوی ڕابردوو بەهۆی بارانبارین ژمارەیەک فیدەری کارەبای سلێمانی دووچاری شۆرت بوون و بەهۆیەوە کارەبای چەند گەڕەکێکی شارەکە کوژاونەتەوە.

 

لێدوانی فەرمی: سیروان محەممەد، وتەبێژی کارەبای سلێمانی بە ئاڤا میدیای ڕایگەیاند، بەهۆی بارانبارین و دروستبوونی شۆرتی كارەباوە لەسەر تۆڕەکانی دابەشکردنی کارەبا، 80 شۆرتی کارەبا دروست بوو و گرفتی بۆ چەند فیدەرێک دروست کرد، بەهۆیەوە ژمارەیەک گەڕەکی شارەکە بێ کارەبابوون.

 

وتەبێژی کارەبای سلێمانی گوتیشی، بەشێک لە تیمەکانی چاککردنەوەی کارەبای سلێمانی لە ئامادەباشیدان و بەشی زۆریشیان لە ئەرکدان و سەرقاڵی چارەسەرکردنی گرفتە تەکنیکییەکانن بۆئەوەی بتوانن بەزووترین کات کارەبا بۆ ئەو گەڕەکانە بگەڕێننەوە، تائێستا زیاتر لە 10 شوێن گرفتەکانیان چارەسەرکراون.