سوودانی بۆ سەرۆکوەزیران مەسرور بارزانی: مووچەکانی ئەمساڵ بەپێی ڕێککەوتنەکان خەرج دەکرێت

ئاڤا نیوز

محەممەد شیاع سوودانی لە دیدارێکی تایبەت لەگەڵ سەرۆکوەزیرانی کوردستان، جەخت لە خەرجکردنی مووچەکانی ئەمساڵی مووچەخۆرانی هەرێمی کوردستان دەکاتەوە.

چیرۆکی سەرەکی: ئەمڕۆ سێشەممە، لە پەراوێزی کۆڕبەندی مێپس 2025، سەرۆکوەزیران مەسرور بارزانی و محەممەد شیاع سوودانی، سەرۆکوەزیرانی عێراق کۆبوونەوە و تەوەری سەرەکی کۆبوونەوەکەشیان ناردنی مووچەکانی ئەمساڵی مووچەخۆرانی هەرێمی کوردستان بوو بە گوێرەی ڕێککەوتنەکان. 

ڕاگەیێنراوی فەرمی: حکومەتی هەرێمی کوردستان بڵاویکردەوە: مەسرور بارزانی و محەممەد شیاع سوودانی پیرۆزبایی سەرکەوتنی پرۆسەی هەڵبژاردنی خولی شەشەمی پەرلەمانی عێراقیان لە یەکتری کردووە، هەردوولا خوازیاربوون ئەنجامەکانی ئەم هەڵبژاردنە ببێتە هۆی دەستپێکردنی سەردەمێکی نوێ لە پێناو سەقامگیریی دۆخی عێراق و باشتربوونی خزمەتگوزارییە گشتییەکان. 

لەلایەکی دیکەوە: هەر بەگوێرەی ڕاگەیێنراوەکە، لەمیانەی کۆبوونەوەکە جەخت لە گرنگی دابینکردنی مووچە و شایستە داراییەکانی هەرێمی کوردستان کراوەتەوە. 

- محەممەد شیاع سوودانی، سەرۆکوەزیرانی عێراق دووپاتی کردووەتەوە کە مووچەکانی هەرێمی کوردستان بۆ ئەمساڵ بە پێی ڕێککەوتنەکان دەدرێت. باسی لەوەشكردووە بۆ ساڵی داهاتوو هەرێمی کوردستان بەشە بودجەی خۆی لە چوارچێوەی بودجەی گشتیی فیدراڵی دەبێت.