مەسرور بارزانی و فایەق زێدان جەخت لە پێکهێنانی حکومەتێکی خزمەتگوزار بۆ عێراق دەکەنەوە

ئاڤا نیوز 

 

سەرۆکوەزیران مەسرور بارزانی و سەرۆکی ئەنجوومەنی باڵای دادوەریی عێراق جەخت لە پێکهێنانی حکومەتێکی خزمەتگوزار و دابنیکردنی سەقامگیریی سیاسیی لە عێراق و پاراستنی مافی گشت پێکهاتەکان دەکەنەوە.

 

چیرۆکی سەرەکی: ئەمڕۆ سێشەممە 18-11-2025، سەرۆکوەزیران مەسرور بارزانی، لە شاری دهۆک لەگەڵ فایەق زێدان، سەرۆکی ئەنجوومەنی باڵای دادوەریی عێراق کۆبووەوە. لە کۆبوونەوەکەدا، دۆخی گشتیی عێراق دوای هەڵبژاردنی ئەنجوومەنی نوێنەران و هەوڵ و گفتوگۆکانی پێکهێنانی کابینەی نوێی حکومەتی فیدراڵ تاوتوێ کرا.

 

ڕاگەیێنراوی فەرمی؛ سەرۆکوەزیران مەسرور بارزانی لە هەژماری  تایبەتی خۆی لە فەیسبووک لەبارەی کۆبوونەوەکە نووسیویەتی، "هاوڕابوووین لەسەر پێکهێنانی حکومەتێکی خزمەتگوزار و دابینکردنی سەقامگیریی سیاسیی لە عێراق و پاراستنی مافی گشت پێکهاتەکان".

 

زانیاریی زیاتر: لە بەشێکی دیکەی گفتوگۆکاندا، جەخت لە گرنگیی پەرەپێدانی هاوکاریی و هەماهەنگیی نێوان هەردوولا کرا لەپێناو جێبەجێکردنی دەستوور و چارەسەرکردنی کێشەکانی نێوان هەرێمی کوردستان حکومەتی فیدراڵ و پاراستنی قەوارەی دەستووری هەرێمی کوردستان.

 

ئەمەش بزانە: هەر لە کۆبوونەوەکەدا، پێویستیی و گرنگیی پێکهێنانی ئەنجومەنی فیدراڵی دووپات کرایەوە لە پێناو پاراستنی هاوسەنگی و مافەکانی هەرێمی کوردستان و پارێزگاکان.