وەزارەتی دارایی: سبەی 120 ملیار دینارەکە بۆ بەغدا دەنێردرێت

ئاڤا نیوز

 

سبەی چوارشەممە داهاتی نانەوتیی هەرێمی کوردستان بەشێوەی کاش دەخرێتە سەر هەژماری بانکی وەزارەتی دارایی حکومەتی فیدراڵ. هاوکات ئەمڕۆ ڕاپۆرتی تەرازووی پێداچوونەوەی خەرجی و داهاتەکانی هەرێمی کوردستان بۆ مانگی نۆ بۆ بەغدا نێردرا.

 

بۆچی گرنگە؛ بەپێی ڕێککەوتنی نێوان بەغدا و هەرێمی کوردستان، پێویستە مانگانە هەرێمی کوردستان 120 ملیار دینار وەکو داهاتی نانەوتی بۆ بەغدا بنێرێ، ئینجا بەغدا بڕیاری خەرجکردنی مووچەی مووچەخۆرانی هەرێمی کوردستان دەدات. 

 

ڕاگەیێنراوی فەرمی: وەزارەتی دارایی و ئابووریی هەرێمی کوردستان ڕایگەیاند، ئەمڕۆ سێشممە 18-11-2025،  ڕاپۆرتی تەرازووی پێداچوونەوەی خەرجی و داهاتەکانی هەرێمی کوردستان بۆ مانگی نۆ بۆ وەزارەتی دارایی حکومەتی فیدراڵ نێردرا.

 

ئەوەی پێویستە بیزانیت؛ وەزارەتی دارایی ڕاشیگەیاند، سبەی چوارشەممە ڕێککەوتی 19-11-2025، بڕی 120 ملیار دینار، وەک پشکی گەنجینەی فیدراڵی لە داهاتی نانەوتیی هەرێمی کوردستان بۆ مانگی نۆ بەشێوەی کاش دەخرێتە سەر هەژماری بانکی وەزارەتی دارایی حکومەتی فیدراڵی لە لقی هەولێری بانکی ناوەندیی عێراق.