شازادەی جێنشینی سعوودیە لەبارەی سوودانەوە داواکارییەک ئاراستەی ترەمپ دەکات

ئاڤا نیوز

لە میانەی سەردانەکەی محەممەد بن سەلمان، شازادەی جێنشینی سعوودیە بۆ واشنتن داوای لە ترەمپ کرد هاوکار بێت بۆ ڕاگرتنی ململانێکان لە سوودان، ترەمپیش بە ئەرێنی وەڵامی داواکەی بن سەلمان داوەتەوە.

وێنە گەورەکە: دۆناڵد ترەمپ، سەرۆکی ئەمریکا،  بە دەگمەن قسەی لەسەر ململانێکان دەکات، لەبری ئەوە سەرنجی لەسەر شەڕەکانی غەززە و ئۆکراینا بوو لە هەوڵەکانیدا بۆ بەدەستهێنانی خەڵاتی نۆبڵی ئاشتی بووە، بەڵام لە چوارچێوەی سەردانەکەی محەممەد بن سەلمان، شازادەی جێنشینی سعوودیە داوای لە ترەمپ کردووە لەسەر پرسی سوودانیش کاربکات.

زانیاریی بەدەستهاتوو: لە میانی بەشداریکردنی لە کۆڕبەندی وەبەرهێنانی ئەمریکا و سعوودیە، ترەمپ وتی، کۆتایم بە 8 شەڕ هێنا، سوودان لە پلانەکانمدا نەبووە، بەڵام شازادە بن سەلمان وای لێکردم گرنگی پێبدەم، وتیشی شازادەی جێنشینی سعوودیە دەیەوێت شتێک لەسەر سوودان بکەم و دوای 30 خولەک لە داواکارییەکەی، دەستم کرد بە کارکردن لەسەر فایلی سوودان بۆ یەکلاییکردنەوەی ململانێکان. 

زانیاریی زیاتر: هەرچەندە پێشتر واشنتن داوای لە هەردوو لایەنی ململانێی سوودان کردبوو بگەنە ڕێککەوتنی ئاگربەست، لەسەر ئەم پرسە مەسەد بولۆس، نوێنەری سەرۆکی ئەمریکا بۆ ئەفریقا، ڕاگەیاند، شەڕی سوودان گەورەترین قەیرانی مرۆیی جیهانە.