پلانی ئاشتیی ترەمپ بۆ ئۆکراینا گۆڕانکاریی بەسەردا دێت

ئاڤا نیوز

ئۆکراینا گۆڕانکاری بەرچاوی لە پلانی ئاشتی ئەمریکادا کردووە کە ئامانج لێی کۆتاییهێنانە بە شەڕی لەگەڵ ڕووسیا، لە بەرامبەردا کەسانی ئاگادار لە دانوستانەکانیش دەڵێن: لەم هەموارکردنەدا هەندێک لە داواکارییەکانی ڕووسیای لابراون. 

چیڕۆکی سەرەکی: بەرپرسانی ئەمریکا و ئۆکراینا ڕۆژی یەکشەممە لە جنێڤ کۆبوونەوە و تاوتوێی ڕەشنووسی پلانی واشنتنیان بۆ کۆتاییهێنان بە شەڕی ئۆکراینا کرد، لە میانەی کۆبوونەوەکەدا  هەردوولا جەختیان لەوە کردەوە کە لەسەر ئەم پلانە کاردەکەن تاوەکو هەموو لایەک پێی ڕازی بێت.

لێدوانی فەرمی: ڤۆلۆدیمیر زێلێنسکی، سەرۆکی ئۆکراینا ڕایگەیاند، ئێستا ئەو هەنگاوانەی کە پێویستن بۆ کۆتاییهێنان بە شەڕەکە خراوەتە ناو لیستەکەوە، دوای کۆبوونەوەی جنێڤ چیتر 28 خاڵ نییە و ژمارەیەکی کەمتر هەیە، تیمەکەمان ڕاپۆرتێکی لەسەر ڕەشنووسی نوێی هەنگاوەکان پێشکەشکردووە و ئەمە ڕێبازێکی دروستە.

-لە درێژەی قسەکانیدا زێلێنسکی جەخت لەوە دەکاتەوە، چەند پرسێکی هەستیار هەن کە لەگەڵ دۆناڵد ترەمپ هاوتا ئەمریکییەکەی تاوتوێی دەکات.

لەلایەکی دیکەوە: بەگوێرەی کەسانی ئاگادار لە دانوستانەکان دەڵێن، لەپلانەکەدا هەندێک لە داواکارییە گرنگەکانی ڕووسیا  لابراون، بەهۆی ئەمەشەوە بەرپرسێکی ڕووسیا  هەموارکردنەکانی ڕەتدەکاتەوە و بە "تەواو نابوونیادنەر " ناوی برد.