كۆمەڵی دادگەری: جۆرێك لە نیگەرانی لەنێوان ئێمە و پارتی هەیە، بەڵام پێویستە یەكدەنگ بین

ئاری عەبدوڵڵا

ئەندامێكی مەكتەبی سیاسیی کۆمەڵى دادگەریى دەڵێت، ڕاستە جۆرێك لە نیگەرانی لەنێوان ئێمە و پارتی هەیە، بەڵام خواست و بەرژەوەندییەكانی خەڵكی كوردستان پێویست دەكات، لە دانووستانەكانی بەغدا هاوبەش بین.

چیرۆکی سەرەکی: ئێوارەی ئەمڕۆ چوارشەممە، شاندێكی مەكتەبی سیاسیی پارتی، كە پێكهاتبوون لە د. پشتیوان سادق، عەلی حوسێن، ئەندامانی مەكتەبی سیاسیی ئەو حیزبە، سەردانی مەكتەبی سیاسیی كۆمەڵی دادگەرییان كرد لە هەولێر و لەلایەن ئەندامانی مەكتەبی سیاسی ئەو حیزبەوە بە سەرۆكایەتی، عەبدولستار مەجید، شوان ڕابەر پێشوازییان لێكرا.

لێدوانی فەرمی: عەبدولستار مەجید، ئەندامی مەكتەبی سیاسیی كۆمەڵی دادگەری لە لێدوانێكی ڕۆژنامەوانیدا ڕایگەیاند، بە شاندی پارتیمان ڕاگەیاندووە، وەها باشتر و پەسەندترە كە لایەنە كوردستانییەكان هەموومان بەیەكەوە بە كارنامەیەكی هاوبەش بچینە بەغدا كە زامنی هێنانەدی مافە یاسایی و دەستوورییەكانی هەرێمی كوردستان دەكات.

ئەو ئەندامەی كۆمەڵی دادگەری ئاماژەی بەوەشكرد، ئەو قسانەی لە گڕوتینی ماوەی بانگەشەی هەڵبژاردن دەوترێن، مەرج نییە لە كاتێكی دیكەی ئاسایی بوترێن؛ ڕاستە جۆرێك نیگەرانیی لەنێوان ئێمە و پارتی هەیە، و سەرەڕای هەموو سەرنج و تێبینییەكانیش، بەڵام هاودەنگبوون لە بەغدا، پەیوەندیی بە تێكڕای هەرێمی كوردستان و بەرژەوەندیی هاووڵاتیانەوە هەیە و بەمجۆرە دەسكەوتی زیاتری دەبێت.

زانیاریی زیاتر: عەبدولستار مەجید وتیشی، داوامان كرد لە نزیكترین كاتدا كۆبوونەوەیەك لەسەر ئاستی مەكتەبی سیاسیی هەموو لایەنە براوەكانی هەڵبژاردن بكرێت و لەو كۆبوونەوەیە؛ نەخشەڕێگایەك دابنرێت بۆ ئەوەی كورد لە بەغدا یەكدەنگ و هاوهەڵوێست بێت.