کاروان ستوونی: ماوەی ڕاییکردنی مامەڵەی حاجییان بۆ یەک هەفتە درێژ دەکرێتەوە

ئاڤا نیوز

وتەبێژی حەج و عومرەی کوردستان ڕایدەگەیێنێت، ماوەی ڕاییکردنی مامەڵەی حاجییان بۆ یەک هەفتە درێژ دەبێتەوە.

چیرۆکی سەرەکی: ڕۆژی یەکشەممە فەرمانگەی تەکنەلۆژیای زانیاری، تیروپشکی ناوی حاجییانی ئەنجامدا، سێ هەزار و 901 کەس ناویان بۆ حەج دەرچوو و 113 کورسی دیکەش بۆ کەسوکاری شەهیدان تەرخانکراوە. وەزارەتی ئەوقاف لەپێناو هاوکاریکردنی زیاتر بەو کەسانەی کە دواکەوتوون لە ڕاییکردنی مامەڵەکانیان، ماوەی یەک هەفتەی درێژکردەوە.

لێدوانی فەرمی: کاروان ستوونی، وتەبێژی حەج و عومرەی کوردستان بە ئاڤای ڕاگەیاند، لەپێناو بەرژەوەندی و خزمەتی زیاتری ئەو کەسانەی کە ناویان بۆ فەریزەی حەج دەرچووە، بەڵام دواکەوتوون لە ڕاییکردنی مامەڵەکانیان، وەزارەتی ئەوقاف و کاروباری ئایینیی کوردستان بڕیاریدا، بە درێژکردنەوەی ماوەی ڕاییکردنی مامەڵەکانیان و تێچووی حەج بۆ ماوەی هەفتەیەک، بۆئەوەی مافی گەشتکردنیان بۆ فەریزەی حەج نەفەوتێ.

زانیاریی زیاتر: تێچووی حەجی ئەمساڵ حەوت ملیۆن و 100 هەزار دینارە و سەرجەم گەشتەکان تەنیا لە ڕێگەی ئاسمانییەوە دەبن.

ئەوەی پێویستە بیزانیت: بڕیار بوو ڕۆژی پێنج شەممە 27-11-2025، کۆتا وادەی ڕاییکردنی مامەڵەکان بێت، بەڵام دوای بڕیاری وەزیری ئەوقاف و کاروباری ئایینی، د. پشتیوان سادق ماوەکەی درێژکرایەوە بۆ ڕۆژی پێنج شەممە 4-12-2025، واتە یەک هەفتە دواتر.

ئەمەش بزانە: نووسینگەکانی حەج و عومرە لەسەرجەم شار و ئیدارە سەربەخۆکان لە کاتژمێر 8:30ـی بەیانی تاوەکو کاتژمێر 4:00ـی ئێوارە مامەڵەی حاجییان ڕایی دەکەن.