کۆبوونەوەی کۆمیسیۆنە پەرلەمانییەکەی تورکیا دواخرا

ئاڤا نیوز

بڕیار بوو ئەمڕۆ لە کۆبوونەوەی کۆمیسیۆنی یەکڕیزیی نیشتمانی، برایەتی و دیموکراسی ناوەڕۆکی کۆبوونەوەی شاندی کۆمیسیۆنەکە لەگەڵ ئۆجەلان بڵاو بکرێتەوە، بەڵام کۆبوونەوەکە دواخرا.

وێنە گەورەکە: دوای ئەوەی کۆمیسیۆنەکە بە دەنگی سێ لەسەر پێنجی ئەندامانی بڕیاری دا سەردانی عەبدوڵڵا ئۆجەلان بکرێت لە دوورگەی ئیمراڵی، 24-11-2025 سەردانەکە ئەنجام درا و ئەمەش لە ناوخۆی تورکیا کاردانەوەی زۆری لێ کەوتەوە.

زانیاریی بەدەستهاتوو: بڕیار بوو ئەمڕۆ بەمەبەستی خستنەڕووی ناوەڕۆكی سەردانەکەی بۆ لای ئۆجەلان کۆمیسیۆنەکە کۆببێتەوە هەروەك تولای هاتیمئۆغوڵڵاری، هاوسەرۆکی گشتیی دەم پارتی و نوعمان کورتوڵموش، سەرۆکی پەرلەمانی توركیا ڕایانگەیاندبوو، بەڵام کۆبوونەوەکە بۆ کاتێکی دیکە دواخرا.

بەتەنیشت ئەم بابەتەوە: تولای هاتیمئۆغوڵڵاری هیوای خواست تەواوی قسەکانی ئۆجەلان بۆ ڕای گشتی بڵاو بکرێنەوە، هاوکات باسی لەوەش کرد كە ئەم بڕیارە بە دەست کۆمیسیۆنەکەیە و وتی: لەگەڵ ئەوەشدا دەزانین ئۆجەلان باسی لە هاوپەیمانێتیی کورد و تورک، پێکەوەژیانی ئاشتییانەی گەلان، کۆتاییهێنانی یەکجارەکی بە شەڕوپێکدادان، چارەسەرکردنی کێشەکانی سووریا و ڕۆژئاوای کوردستان، هەموارکردنەوەی یاساکان و ڕەخساندنی زەمینەسازیی یاسایی بۆ پرۆسەکە کردووە.

ئەوەی پێویستە بیزانیت: ڕۆژی دووشەممەی ڕابردوو هەریەک لە گوڵستان کڵچ کۆچییغیت، جێگری سەرۆکی فراکسیۆنی دەم پارتی لە پەرلەمانی تورکیا؛ حوسێن یایمان، یاریدەدەری سەرۆکی گشتیی ئاک پارتی و فەتی یڵدز، یاریدەدەری سەرۆکی گشتیی مەهەپە بۆ کاروباری یاسایی و هەڵبژاردن کە هاوکات پەرلەمانتاری پارتەکانیشیانن لەگەڵ ئۆجەلان کۆبوونەوە و کۆبوونەوەکە نزیکەی سێ کاتژمێری خایاند.

ئەمەش بزانە: بڕیاری دواخستنی کۆبوونەوەکەی ئەمڕۆی کۆمیسیۆنە پەرلەمانییەکەی تورکیا لە کاتێکدایە، بە هۆی هەستیاری بابەتەکە دوای دووجار لە دواخستن و لە 21-11-2025، 18ەمین کۆبوونەوەی کۆمیسیۆنەکە ئەنجام درا و بڕیار درا سەردانی ئۆجەلان بکرێت لە دوورگەی ئیمراڵی.