دادگاییکردنی فەزڵ شاکر بۆ مانگی شوبات دواخرا

ئاڤا نیوز

دادگای سەربازیی لوبنان بڕیاری دواخستنی پرۆسەی دادگاییکردنی هونەرمەندی لوبنانی فەزڵ شاکری دا.

چیرۆکی سەرەکی: بڕیاربوو ئەمڕۆ چوارشەمە، هونەرمەندی لوبنانی فەزڵ شاکر دادگایی  بکرێت، بەڵام لەسەر داوای پارێزەرەکەی دادگایکردنەکە دواخرا، بەمەبەستی پێداچوونەوەی زیاتر بەو دۆسیانەی لە دژی هونەرمەندەکە تۆمارکراون. ئەمەش لەدوای ئەوە هات هونەرمەندەکە لە ماوەی ڕابردوو لە کەمپی عەین ئەلحیلوە خۆی ڕادەستی سوپای لوبنان کرد.

زانیاریی بەدەستهاتوو: سەرچاوەکان لەبارەی بێتاوانبوونی هونەرمەندەکە لە دۆسیەی دارایی گرووپە تیرۆرستییەکان جەختیان کردەوە: "هیچ بەڵگەیەکی پێویست لەبەردەستدا نییە کە هونەرمەندە لوبنانییەکە بە چالاکییە داراییە نایاساییەکانەوە گرێ بداتەوە و لێکۆڵینەوەکان هیچ ئاماژەیەکی گوماناوییان لە مامەڵەکانیدا نەدۆزیوەتەوە."

لەلایەکی دیکەوە: دەستەی دادوەری پێشنیازی کردووە دوو تۆمەتی سەرەکی لەسەر لاببرێت کە پێشتر حوکمی لەسەر درابوو، ئەوانیش تۆمەتەکانی "سووکایەتیکردن بە دەوڵەت" و "پارەدارکردنی گرووپە تیرۆریستییەکان" بوو

ئەوەی پێویستە بیزانیت: ئەمساڵ هونەرمەند فەزڵ شاکر چەند گۆرانییەکی بڵاوکردەوە و دەنگدانەوەیەکی زۆری دروست کرد، یەکێک لەو گۆرانیانە "سەحاک شووک" لەماوەی دوو مانگدا نزیکەی 110 ملیۆن بینەری هەبووە.

باکگراوند: پێشتر فەزڵ شاکر شانبەشانی ئەحمەد ئەسیر، پیاوی ئایینی سەلەفییەکان دژی سوپای لوبنان شەڕیان کردووە لە شاری سەیدای لوبنان لە ساڵی 2013دا کە بە "ڕووداوەکانی عیبرا" ناسراوە، بەو هۆیەوە چەندین ئەندامی سوپای لوبنان کوژران، دادگای سەربازیی لوبنان لە کۆتاییەکانی ساڵی 2020دا سزای 22 ساڵ زیندانیکردنی بە غیابی بۆ دەرکرد، لە دوای ئەوە فەزڵ شاکر بۆ ئەوەی لە دەستبەسەرکردن ڕزگاری بێت، پەنای بۆ کەمپی عەین ئەلحیلوە برد کە دەکەوێتە شاری سەیدا.