سەرکردەیەکی ڕەوتی حیکمە: 12 کەس بۆ پۆستی سەرۆکوەزیران کاندیدن

ئاڤا نیوز

 

ئەندامێکی ڕەوتی حیکمەی نیشتمانی دەڵێت، تائێستا 12 کەس بۆ پۆستی سەرۆکوەزیرانی عێراق خۆیان کاندید کردووە لەناویاندا محەممەد شیاع سوودانی سەرۆکوەزیرانی ئێستا  و نووری مالیکی، سەرۆکوەزیرانی پێشووتر هەن، لیژنەی چوارچێوەی هەماهەنگیش بەگوێرەی پێوەرەکان خاڵ بۆ کاندیدەکان دادەنێت.

 

وێنە گەورەکە: چاوەڕێ دەکرێت تاوەکو کۆتایی مانگی داهاتوو سەرجەم ڕێکارەکانی پەیوەست بە هەڵبژاردن تەواوبکرێن و دادگای فیدڕاڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

 

لێدوانی فەرمی: ڕەحیم عەبودی، ئەندامی سەرکردایەتی ڕەوتی حیکمە لە چاوپێککەوتنێکی تەلەفیزیۆنیدا ئاماژەی بەوەشكرد، تا ئێستا 12 کەس بۆ پۆستی سەرۆکوەزیرانی عێراق سی ڤی خۆیان پێشکەش کردووە لەوانەش محەممەد شیاع و نووری مالیکی، لیژنەی چوارچێوەی هەماهەنگیش کە تایبەتە بە هەڵسەنگاندنی ناوی کاندیدەکان بەگوێرەی چەند بنەمایەک لەوانەش چی دەکەیت؟ بەرنامەت چییە؟ و چۆن و لەماوەی چەندێکدا بەرنامەکە جێبەجێی دەکەیت؟، هەڵسەنگاندن بۆ کاندیدەکان دەکات و خاڵیان بۆ دادەنێت.

 

وتیشی، چوارچێوەی هەماهەنگی بەنیازە لیژنەیەک لەناو نووسینگەی سەرۆکوەزیرانی عێراق دروستبکات تا ڕاپۆرتی ڕۆژانە، هەفتانە و مانگانە پێشکەشی سەرکردەکانی  چوارچێوەی هەماهەنگی بکات و چاودێریی جێبەجێکردنی کارنامەی حکومەت بێت.