ئەبابیل؛ ئەو باڵندەیەی دەتوانێت ماوەی 10 مانگ بەبێ نیشتنەوە لەئاسماندا بمێنێتەوە

ئاڤا نیوز

باڵندەی ئەبابیل، لە ناوچە جیا جیاكانی كوردستان بە پەرەسێلكە، كارتەپەلە، سەمامە، شمشێرەباڵ و ناوی دیكەش ناودەبرێت، بەڵام ئەو ناوەی لەهەموو ناوەكانی دیكەی باوترە؛ تەیرولئەبابیلە. ئەو باڵندەیە ئەوەندە بەشێوەیەكی ناوازە لەلایەن خوداوە دروستكراوە، توانا سەرسووڕهێنەرەكانی نزیكە لەوەی وەك موعجیزە و پەرجوو، سەیر بكرێت.

ئەوەی لەبارەیەوە دەوترێت: بەپێی بەدواداچوون و لێكۆڵینەوەی وردی زاناكان، ئەو باڵندەیە دەتوانێت ماوەی 10 مانگ بەبێ نیشتنەوە لە ئاسماندا بمێنێتەوە، ئەمەش درێژترین فڕینی بەردەوامە كە تا ئێستا بۆ هەر باڵندەیەك تۆماركرابێت.

ئەوەی پێویستە بیزانیت: ئەوەی جێی سەرنجە، ئەبابیل تەنانەت هەر لەكاتی فڕیندا هەموو پێداویستییەكانی دابین دەكات، هەر بە ئاسمانەوە ڕاو دەكات، خواردن دەخوات -لەڕێگەی ڕاوكردنی مێشوولە و باڵندەی لەخۆی بچووكتر- و ئاو دەخواتەوە -ئەوكاتەی بەخێرایی بەسەر ئاوی ڕووبارەكاندا دەڕوات-، هەر بە ئاسمانەوە كرداری جووتبوون دەكات، تەنانەت هەر لەكاتی فڕیندا دەخەوێت؛ لەڕێگەی بەكارهێنانی تەكنیكی فڕینی تۆماتیكی، بەجۆرێك؛ باڵندەكە بۆ بەرزاییەكی زۆر بڵند بەرز دەبێتەوە، پاشان لەگەڵ خۆفڕێدان بۆ خوارەوە نیوەی مێشكی دەكووژێنێتەوە، لەسەر ئۆتۆ پایلۆت دەخەوێت.

پێدراوە ڕاستییەكان: زاناكان دەڵێن، خاڵی لاوازی پەرەسێلكە نیشتنەوەیە، بەهۆی كورتی قاچەكانی، لەكاتی نیشتنەوەی ئەستەمە جارێكی دیكە بفڕێتەوە، بەتایبەت كە خاكی ژێر قاچە لاوازەكانی ڕەق بێت، لەبەر ئەم هۆكارە، هێلانەی زۆرتر لەسەر قەد و لق و پۆپی دارە بەرزەكان بونیاد دەنێت لەڕێگەی كۆكردنەوەی قووڕی خەست بە دەنووكی و كە دوای ماوەیەكی زۆر، هێلانەیەكی تۆكمەی لێ دروست دەكات.