هاوپەیمانیی ئاوەدانکردنەوە و گەشەپێدان: دەستبەرداری سوودانی بۆ پۆستی سەرۆکوەزیران  نابین

ئاڤا نیوز

هاوپەیمانیی ئاوەدانکردنەوە و گەشەپێدان جارێکی دیکە جەختیکردەوە کە محەممەد شیاع سوودانی، سەرۆکی هاوپەیمانییەکە تاکە کاندیدیانە بۆ پۆستی سەرۆکوەزیرانی داهاتووی عێراق و دەستبەرداریشی نابن.

ڕاگەیێنراوی فەرمی: هاوپەیمانیی ئاوەدانکردنەوە و گەشەپێدان لەبەیاننامەیەکدا بڵاوی کردەوە، بە سەرۆکایەتیی محەممەد شیاع سوودانی و بە ئامادەبوونی سەرجەم ئەندامانی، هاوپەیمانیی ئاوەدانکردنەوە و گەشەپێدان، کۆبوونەوەی ئاسایی خۆی ئەنجامدا.

زانیاریی زیاتر: لە کۆبوونەوەکەدا هاوپەیمانیی ئاوەدانکردنەوە و گەشەپێدان جەختی لەسەر پابەندبوون بە وادە دەستوورییەکان بۆ پێکهێنانی حکومەتی داهاتوو کردەوە، هاوکات دووپاتیکردەوە کە پێویستە بەرنامەی حکوومەت بەرنامەیەکی تۆکمەی سیاسی، ئابووری و ئەمنی بێت و توانای رووبەڕووبوونەوەی ئاڵنگارییە گەورەکانی عێراقی هەبێت، بە جۆرێک کە لەگەڵ خواستەکانی گەل بۆ ئاوەدانکردنەوە و گەشەپێدان و خۆشگوزەرانی بگونجێت.

لەلایەکی دیکەوە: هاوپەیمانییەکە، ئاماژەی بەوەشدا کە هاوپەیمانیی ئاوەدانکردنەوە و گەشەپێدان گەورەترین فراکسیۆنی چوارچێوەی هەماهەنگییە و مافی خۆیەتی پۆستی سەرۆکوەزیران وەربگرێت و سوودانیش تاکە کاندیدیانە بۆ ئەو پۆستە.

باکگراوند: لە هەڵبژاردنی پەرلەمانی عێراق کە لە 11-11-2025 بەڕێوەچوو، هاوپەیمانیی ئاوەدانکردنەوە و گەشەپێدان کە سوودانی سەرۆکایەتی دەکرد 45 کورسی بەدەستهێنا، لەسەر ئاستیی هاوپەیمانییەکان زۆرترین کورسی بەدەستهێنا.