تورکیا پشکی ئاوی عێراق جێگیر دەکات

ئاڤا نیوز

 

بڕیارە لە چەند ڕۆژی داهاتوودا ڕێكکەوتنی نێوان بەغدا و ئەنقەرە تایبەت بە ئاو بچێتە بواری جێبەجێکردنەوە، ڕاوێژکاری سەرۆکوەزیرانی عێراقیش بۆ کاروباری ئاو دەڵێت، بەگوێرەی ڕێککەوتنەکە پێداویستی ڕاستەقینەی وڵات بۆ ئاو لەلایەن تورکیاوە جێگیر دەکرێت.

 

وێنە گەورەکە: 2ی مانگی ڕابردوو عێراق و تورکیا میکانیزمێکی نوێیان بۆ ڕێککەوتنی هاوکاریی ئاو واژۆ کرد. ئەم ڕێککەوتنە چەندین خاڵی سەرەکی لەخۆ دەگرێت، لەوانە دابینکردنی ئاو لە بەرامبەر بەڕێوەبردنی تەواوی دۆسیەی ئاوی عێراق لەلایەن تورکیاوە، هەروەها پارەدارکردنی پڕۆژەکان لە ڕێگەی فرۆشی نەوتی عێراقەوە.

 

لێدوانی فەرمی: تۆرهان موفتی، ڕاوێژکاری سەرۆکوەزیرانی عێراق بۆ کاروباری ئاو ڕایگەیاند، دوای تەواوبوونی ڕێکارەکان، لە چەند ڕۆژی داهاتوودا ڕێککەوتنی نوێی ئاو لەنێوان عێراق و تورکیا دەچێتە بواری جێبەجێکردنەوە، لەئێستاشەوە تورکیا پشکی ئاوی عێراقی لەهەردوو ڕووباری دیجلە و فوڕات زیادکردووە.

 

وتیشی، بەگوێرەی ڕێککەوتنەکە عێراق پێداویستی ڕاستەقینەی خۆی بۆ ئاو لە بوارەکانی کشتووکاڵ و پیشەسازیی  و بوارەکانی دیکەش پێشکەش بە تورکیا دەکات و لەگەڵ کارابوونی ڕێککەوتنەکەش، پشکی ئاوی عێراق بە جێگیری لەلایەن تورکیاوە بەردەدرێتەوە.