سوودانی: یەدەگی نەوتی عێراق 150 ملیار بەرمیلە

ئاڤا نیوز

سەرۆکوەزیرانی عێراق ئاشکرای دەکات، وڵاتەکەی خاوەن یەدەگێکی گەورەی نەوتە، کە دەگاتە 150 ملیار بەرمیل، داوا دەکات پشکی هەناردەی عێراق لە ئۆپیکدا هەڵسەنگاندنەوەی بۆ بکرێت، بە شێوەیەک لەگەڵ قەبارەی گەورەی یەدەگی نەوتی عێراق بگونجێت.

وێنە گەورەکە: بەگوێرەی داتاکانی "Global Fire Power"، عێراق خاوەنی پێنجەم گەورەترین یەدەگی نەوتی جیهانە و ڕۆڵێکی سەرەکی لە دابینکردنی وزەی جیهانیدا دەبینێت. ئەم یەدەگە زۆرە توانایەکی گەورەی بۆ عێراق خوڵقاندووە تا ببێتە هەناردەکارێکی سەرەکی نەوت و کاریگەری لەسەر بازاڕی وزەی نێودەوڵەتی هەبێت.

چیرۆکی سەرەکی: ئەمڕۆ چوارشەممە، محەممەد شیاع سوودانی، بەشداریی لە کۆنفرانسی وزەی عێراق 2025 كرد و گوتارێکی پێشکەش کرد و لە بەشێک لە قسەکانیدا وتی، "کۆنفرانسەکە دەرفەتێکە بۆ ئاشنابوون بە سیاسەت و بەرنامەکانی دەوڵەت لە کەرتی وزەدا."

لێدوانی ڕۆژنامەوانی: محەممەد شیاع سوودانی، سەرۆکوەزیرانی عێراق وتی، "حکومەت هەوڵدەدات تا ساڵی 2030، 40%ـی بەرهەمی نەوت بکاتە پیشەسازیی گۆڕانکاری، لەبری پشتبەستن بە هەناردەکردنی نەوتی خاو." جەختیشی کردەوە کە ئەمە "بەرهەمە نەوتییەکان، وزەی نوێبووەوە و پیشەسازییە پەیوەندیدارەکان دەگرێتەوە."

ئاماژەی بەوەش کرد، "حکومەت پێشکەوتنێکی بەرچاوی بەدەستهێناوە لە کەمکردنەوەی سووتاندنی گازی هاوەڵ بە ڕێژەی 70%."

لەهەمان کاتدا: سەرۆکوەزیرانی عێراق داوای کرد، "پشکی هەناردەکردنی عێراق لە ڕێکخراوی ئۆپیکدا هەڵسەنگاندنەوەی بۆ بکرێت، بە شێوەیەک لەگەڵ قەبارەی گەورەی یەدەگی نەوتی عێراق و توانای بەهێزکردنی دابینکردنی وزەی جیهان ڕەنگ بداتەوە."