حەیدەر بەرزنجی: چوارچێوەی هەماهەنگی ئاگاداری بڕیارەکەی حکومەت دژی حیزبوڵڵا و حووسییەکان نییە

ئاڤا نیوز

کەسایەتییەکی نزیک لە چوارچێوەی هەماهەنگی شیعەکان دەڵێت، سەکردەکانی هاوپەیمانێتییەکە ئاگاداری بڕیارەکەی حکومەتی عێراق نین کە دژی حیزبوڵڵای لوبنان و حووسییەکانی یەمەن دەریکردووە، جەختیش دەکاتەوە لەوەی بڕیارەکەی حکومەت لەکۆبوونەوەی هاوپەیمانێتییەکەدا تاوتوێ دەکرێت.

چیرۆکی سەرەکی: لە هەنگاوێکی بێ پێشینەدا و بەتاوانی کاری تیرۆرستی، لیژنەی ڕووبەڕووبوونەوەی سیپیکردنەوەی پارە و پارەدارکردنی تیرۆری سەر بە حکومەتی عێراق سزای بەسەر حیزبوڵڵای لوبنان و حووسییەکانی یەمەندا سەپاند و بڕیاری بلۆککردنی سەرجەم سامان و پارە و موڵکەکانیانی دەرکرد.

لێدوانی فەرمی: حەیدەر بەرزنجی، سەرۆکی دامەزراوەی نەرامسین بۆ گفتوگۆ و گەشەپێدان و کەسایەتی نزیک لە چوارچێوەی هەماهەنگی شیعەکان، ئەمڕۆ پێنجشەممە لە بەغدا بە دەروون مەلا ناجی، پەیامنێری ئاڤا میدیای ڕاگەیاند، بڕیارەکەی حکومەتی عێراق دژی حیزبوڵڵای لوبنان و حووسییەکانی یەمەن بڕیارێکی سەیرە و چوارچێوەی هەماهەنگی ئاگاداری بڕیارەکە نەبووە.

زانیاریی زیاتر: بەرزنجی باوەڕی وایە ناکرێت عێراق ببێتە بەشێک لە ئابڵوقەدانی لوبنان و یەمەن و لەڕووی مرۆییەوە ئەوە کارێکی زەحمەتە، هاوکات ناکرێت هەر بڕیارێک خەزێنەی ئەمریکا بیدات عێراقیش جێبەجێی بکات، بەڵام لەگەڵ ئەوەشدا بەرژەوەندییەکانی عێراق لەسەرجەم بوارەکاندا دەبێت کاری لەپێشینە بێت.

لەلایەکی دیکەوە: لەبارەی کاندیدکردنی دۆناڵد ترەمپ، سەرۆکی ئەمریکا بۆ وەرگرتنی خەڵاتی نۆبڵی ئاشتی لەلایەن محەممەد شیاع سوودانی، سەرۆکوەزیرانی عێراقەوە، حەیدەر بەرزنجی وتی، بەشێک لە سەرکردەکانی چوارچێوەی هەماهەنگی ئاگاداری ئەم کاندیدکردنە بوون، چونکە پێشتر ترەمپ پەیوەندی بە سوودانییەوە کردووە و داوایکردووە عێراقیش ئەو بۆ وەرگرتنی خەڵاتی نۆبڵ کاندید بکات، سوودانیش دوای ڕاوێژ لەگەڵ سەرکردەکانی چوارچێوەی هەماهەنگی، داوای لە وەزیری دەرەوەی عێراق کردووە نوسراوی پشتیوانی عێراق بۆ ئەو کاندیدکردنە ئاراستەی لایەنی بەخشەری خەڵاتەکە بکات.