هۆشداری لەبارەی هاتنەخواروەی مین لە ناوچە شاخاوییەکان دەدرێت

ئاڤا نیوز

بەڕێوەبەرایەتیی گشتیی کاروباری مین، هۆشدارییەک لەبارەی هاتنە خوارەوەی مین و پاشماوەی جەنگی بۆ سەر ڕێگاکان و ئاوەدانی دەدات و ئاماژە بۆ ئەوەش دەکرێت، ئەمساڵ هیچ حاڵەتێکی هاتنە خوارەوەی مین و تەقەمەنی تۆمارنەکراوە.

وێنە گەورەکە: ساڵانە لە وەرزی زستان، لەگەڵ بارانی بەخووڕ مین و پاشماوەی جەنگی، شوێنگۆڕکێ دەکەن و لەسەر چیا و بەرزاییەکان دەکەونە سەر ڕێگاکان دەبنەوە، بەمەش مەترسی لەسەر ژیانی هاونیشتمانیان دروست دەبێت.

لێدوانی فەرمی: عەلی عەبدولڕەحمان، بەڕێوەبەری گشتیی کاروباری مینی هەولێر؛ بە ئاڤای گوت، پێویستە هاونیشتمانیان ئاگاداربن لەو ناوچانەی نزیکن لە کێڵگەی مین، چونکە ساڵانە مین و پاشماوەی جەنگی لەگەڵ هاتنە خوارەوەی قوڕ و بەرد، بەشێک لەو مینانەش جێگۆڕكێ دەکەن. 

عەلی عەبدولرەحمان دەشڵێت: ئەمساڵ هیچ حاڵەتێکی هاتنە خوارەوەی مین و پاشماوە جەنگی تۆمارنەکراوە، لە بوونی هەر حاڵەتێک تیمەکانی بەڕێوەبەرایەتی گشتیی کاروباری مین چارەسەری دەکەن.

باکگراوند: بەهۆی هێرشەکانی ڕژێمە یەک لە دوای یەکەکانی عێراق بۆ سەر خەبات و بزاڤی ڕزگاریخوازی کوردستان و شەڕی عێراق - ئێران و شەڕی چەکدارانی داعش، مەزەندە دەکرێت مین و تەقەمەنی لە 776 کیلۆمەتر چوارگۆشە لە خاکی هەرێمی کوردستان چێنرابێت، لە ساڵی 1992 ـەوە تا ئێستا زیاتر لە 70%ـی ئەو ڕووبەرەی بە مین و پاشماوەی جەنگیی نەتەقیوو داپۆشرابوو، پاککراوەتەوە. لەگەڵ ئەوەشدا ساڵانە دەیان هاونیشتمانی لەو ناوچانەی مینڕێژکراون، بریندار دەبن یان گیان لەدەست دەدەن.