چوارچێوەی هەماهەنگی لەبارەی یەکلاییکردنەوەی کاندیدی سەرۆکوەزیران: گەشەسەندنی گرنگ بەدیهاتووە

ئاڤا نیوز

سەرکردەکانی چوارچێوەی هەماهەنگی کۆبوونەوە و دەڵێن، لە یەکلاییکردنەوەی کاندیدەکەیان بۆ پۆستی سەرۆکوەزیرانی داهاتووی عێراق، گەشەسەندنی گرنگ بەدیهاتووە و پابەند دەبن بە یەکلاییکردنەوەی سەرجەم شایستەکان لە ماوەی دیاریکراوی دەستووریدا.

وێنە گەورەکە: چاوەڕێ دەکرێت دوای پەسەندکردنی ئەنجامەکانی هەڵبژاردن لەلایەن دادگای فیدڕاڵییەوە، سەرەتای ساڵی داهاتوو خولی نوێی پەرلەمانی عێراق یەکەم کۆبوونەوەی خۆی ساز بکات، لە هەنگاوی یەکەمدا سەرۆکی پەرلەمان و پاشان سەرۆککۆمار هەڵدەبژێردرێت، دواتریش سەرۆککۆمار کاندیدی پۆستی سەرۆکوەزیران لە پشکی شیعەکان بۆ پێکهێنانی حکومەت ڕادەسپێرێت.

ڕاگەیێنراوی فەرمی: سەرکردەکانی چوارچێوەی هەماهەنگی ئەمشەو لە نووسینگەی عەبدولحوسێن موسەوی، سەرۆکی هاوپەیمانی نەهجی وەتەنی کۆبوونەوە و جەختیان لە گرنگی بەردەوامی هەمانگی بۆ قۆناغی داهاتووکردەوە، لە ڕاگەیێنراوی کۆتایی کۆبوونەوەکەشیاندا دەڵێن، لە گفتوگۆکانی تایبەت بە دیاریکردنی کاندیدی سەرۆکوەزیران گەشەسەندنی گرنگ بەدیهاتووە و ڕێککەوتوون پابەندبن بە سەرجەم وادە دیاریکراوەکان بۆ یەکلاییکردنەوەی شایستەکان.

ئەوەشی خستووەتەڕوو، چوارچێوەی هەماهەنگی پێشوازی لەو هەنگاوانە دەکات کە بۆ بەهێزکردنی کاری پێکەوەیی لەنێوان لایەنە سیاسییەکان دەنرێن، ئەو هەنگاوانەی کە هۆکاردەبن بۆ یەکخستنی هەڵوێستەکان بەرامبەر ئاستەنگییەکان و پاراستنی بەرژەوەندییە باڵاکانی وڵات.