دادگای تاوانی هەولێر سزای لەسێدارەدانی بەسەر د. سیروان مەحموود سەپاند

ئاڤا نیوز

ئەمڕۆ دادگای تاوانەکانی هەولێر حوکمی لەسێدارەدانی بۆ ئەو پزیشکە دەرکرد، کە چوار ئەندامی خێزانەکەی لە گەڕەکێکی شاری هەولێر کوشت.

چیرۆکی سەرەکی: شەوی 13-03-2025، پزیشکێک بەناوی سیروان مەحموود لە گەڕەکی زانکۆی هەولێر هەڵیکوتایە سەر ماڵی خەزووری و هاوسەر و خەزوور و خەسووی و خوشکێکی هاوسەرەکەی کوشت، هەروەها منداڵێکیشی لە ڕووداوەکەدا بریندار کرد، دواتر لەلایەن هێزەکانی ئاسایشی هەولێرەوە دەستگیر کرا.

زانیاریی تایبەت: سەرچاوەیەکی ئاگادار لە دادگای تاوانی هەولێر بە ئاڤا میدیای وت: ئەمڕۆ سێشەممە، دادگای تاوانی هەولێر سێ سزای بۆ دەرکرد، لەسەر کوشتنی خەسوو و خەزوری و بریندارکردنی منداڵەکەی سزای سێداردانی بۆ دەرکرد، هەروەها لەسەر کوشتنی هاوسەرەکەی و خوشکی هاوسەرەکەی سزای زیندانی هەتا هەتایی بۆ دەرکرد.

زانیاریی بەدەستهاتوو: بە وتەی سەرچاوەکەی دادگای تاوانی هەولێر، هەر حوکمێکی لەسێدارەدان کە لە دادگای تاوانەوە دەردەچێت، دواتر دەچێتە دادگای پێداچوونەوەی هەرێمی کوردستان و دەستەی گشتیی دادگای تەمیز، کە هەموو دادوەرەکانی لێیە و داواکاری گشتی سەرۆکایەتیی دەکات و لەوێ تەماشای حوکمەکەی دەکەن، ئەگەر سزا پشتڕاستکرایەوە، کە دروستە، ئەوا ئاراستەی سەرۆکی هەرێمی کوردستان دەکرێت بۆ ئەوەی جێبەجێ بکرێت.

ئەوەی پێویستە بیزانیت: دوای دەرچوونی سزای لەسێدارەدان لایەنی تاوانلێکراو و تاوانباریش دەتوانن داوای تەمیزی بکەن، بەڵام ئەگەر دادگای تەمیز سزاکەی بە دروست زانی، ئەوا بەهیچ شێوەیەک تانەی لێنادرێت.