بانگەوازێک لە پارێزگاری سلێمانییەوە لەبارەی نالەباری کەشوهەوا و دروستبوونی لافاو

ئاڤا نیوز


لە دوانیوەڕۆی ئەمڕۆوە شەپۆلێکی بارانبارینی چڕ ڕووی لە هەرێمی کوردستان کردووە و بە هۆیەوە لافاو دروست بووە. 

لێدوانی فەرمی: هەڤاڵ ئەبوبەکر، پارێزگاری سلێمانی بە ئاڤای ڕاگەیاند: پێشتر هەموو لایەکمان ئاگادارکردووەتەوە لە ئەگەری ڕوودانی لافاو، ئێستاش سەرجەم تیمەکانمان ڕاسپاردووە بەمەبەستی هەماهەنگی و هاوکاری هاووڵاتییان. 

پارێزگاری سلێمانی باس لەوەشکرد، بەردەوامی بارانبارین بووەتە هۆی دروستبوونی لافاو، ڕاگەیاندنی پشوو هیچ لە دۆخەکە ناگۆڕێت، دەسەڵاتیش دراوە بە یەکە ئیدارییە خۆجێیەکان لە ئەگەر پەککەوتنی هاتووچۆ دەوام ڕابگرن. 

- لە لافاوەکەی چەمچەماڵ تەنها یەک هاووڵاتیی بە تەمەن بەهۆی ڕووخانی دیوار بە سەریدا، گیانی لەدەستداوە.

لەلایەکی دیکەوە: پارێزگاری سلێمانی بانگەوازێکی لە ڕێگەی ئاڤاوە ئاراستەی هاووڵاتییانی سنووری سلێمانی و چەمچەماڵ کرد و گوتی: داوا لە هاونیشتمانیان دەکەین لە حاڵەتی زۆر پێویست نەبێت نەیەنە درەوە بۆ سەر شەقامەکان، بۆ ئەوەی تیمەکانی فریاگوزاریی بتوانن هاوکاری خەڵکی بکەن.

- بۆ کۆنترۆڵکردنی ئەو دۆخەی ئێستا دروستبووە، سەرجەم ئەو ڕێگایانمان داخستووە کە بەرەو چەمچەماڵ دەڕۆن بۆ ئەوەی هاووڵاتییانمان تووشی زیانی گیانی نەبن.