لە کەرکووک تەرمی منداڵێکی 9 ساڵان کە لافاو بردبووی، دۆزرایەوە

ئاڤا نیوز

 

تەرمی کچە قوتابییەکی تەمەن 9 ساڵان  لە گوندی تەپەلو سەر بە ناحیەی لەیلان لە کەرکووک دۆزرایەوە. بەمەش ژمارەی گیانلەدەستدان بەهۆی لافاوەوە لە هەرێمی کوردستان و ناوچەکانی دەرەوەی ئیدارەی هەرێمی کوردستان بۆ سێ کەس بەرزبوویەوە.

 

وێنە گەورەکە: ئەمڕۆ سێشەممە شەپۆلێکی بەهێزی بارانبارین هەرێمی کوردستانی گرتەوە و لافاو دروست بوو، لە ناوچەی گەرمیان لە شاری چەمچەماڵ و ناحیەی شۆڕش شەپۆلەکە زۆر بەهێزبوو، کە بووە هۆی گیانلەدەستدانی سێ کەس، کە دوانیان خەڵکی چەمچەماڵ و کەسەکەی دیکەش کە منداڵێکی تەمەن 9 ساڵانە و خەڵکی ناحیەی لەیلانی سەر بە کەرکووکە گیانی لەدەست دا.

 

چیرۆکی سەرەکی: ئەمڕۆ سێشەممە کچە قوتابییەک بەناوی بەیار عیسا کە لە پۆلی سێیەمی سەرەتاییە و تەمەنی 9 ساڵە، لە گوندی فەرقانی سەر بە ناحیەی لەیلان بێسەروشوێن بوو و دەنگۆی ئەوە هەبوو ئاو بردبێتی.

 

لێدوانی فەرمی: سەرچاوەیەک لە پۆلیسی لەیلان بە ئاڤای ڕاگەیاند، تەرمی منداڵێکی تەمەن 9 ساڵان تەرمەکەی لە نزیک گوندی تەپەلو دۆزرایەوە.

 

لەلایەکی دیکە؛  ئەو دوو کەسەی لە چەمچەماڵ گیانیان لەدەستداوە، یەکێکیان پیاوێکی تەمەن 53 ساڵان و یەکێکی دیکەشیان کچێکی گەنجی تەمەن 22 ساڵانە، هاوکات گەنجێکی 30 ساڵان ئێستا لەژێر چاودێڕی چڕی پزیشکیدایە.