سەرپەرشتیاری ئیدارەی گەرمیان: ئەو شوێنانەی ئاویان لێ کۆدەبێتەوە ڕاگر و کەناڵی لێ دروست دەکەین

ئاڤا نیوز

سەرپەرشتیاری ئیدارەی گەرمیان، بەشێکی زیانەکانی لافاو لە سنوورەکە ئاشکرا دەکات، جەخت لەوە دەکاتەوە کە ڕاپۆرتێک بەرز دەکرێتەوە کەمتەرخەمی ئەو کۆمپانیایانە دەخرێتەڕوو کە پڕۆژەکانیان بەنیوەچڵی جێهێشتووە.

چیرۆکی سەرەکی: ڕۆژی چوارشەممە بەهۆی لافاو لە قەزای کەلار منداڵێکی تەمەن 13 ساڵ لە نزیک چەمی گازینۆ کەوتە نێو ئاوەڕۆ و درەنگانی شەو تەرمەکەی دۆزرایەوە.

لێدوانی فەرمی: جەلال شێخ نووری، سەرپەرشتیاری ئیدارەی گەرمیان لە کۆنگرەیەکی ڕۆژنامەوانیدا گوتی، "تیمەکانمان 36 کەسیان لە کاتی لافاوەکە ڕزگارکردووە کە مەترسی لەسەر ژیانیان هەبووە، زیان بەر 150 ماڵ کەوتووە و هەورەبروسکە پاڵاوگەی ئاوی باوەنووری تێکداوە، بەدەر لە زیانی دیکەی پەیوەست بەڕێگاوبانەکان."

ئاماژەی بەوەشکرد، ئەیوب عومەر، لەکاتی ئاسایی بوونەوەی کەشوهەوا بە پایسکیل لە نزیک ئاوەڕۆیەک یاریی کردووە، دواتر کەوتووەتە نێو ئاوەکە،  بەداخەوە خنکاوە."

لەلایەکی دیکەوە: سەرپەرشتیاریی ئیدارەی سەربەخۆی گەرمیان ئاماژەی بەوەدا، ڕاپۆرتێکی زیانەکانی لافاو و هۆکارەکانی بەرز دەکەینەوە، ئەو یەکە نیشتەجێبوونانەی کەمتەرخەمن و نەیانتوانیوە پڕۆژەکانیان تەواو بکەن ئاماژەی پێدەدرێت، هەروەها ئەو شوێنانەی ئاویان لێ کۆدەبێتەوە ڕاگر و کەناڵی لێ دروست دەکەین.