نۆ سەربازی تایلەندی لە پێکدادنەکان لەگەڵ کەمبۆدیا کوژران

ئاڤا نیوز

دووبارە سەرهەڵدەدەنەوە شەڕ و پێکدادانەکانی نێوان تایلەند و کەمبۆدیا و بەهۆیەوە ژمارەیەک کەس بوونەوە قوربانی و هەزارانی دیکەش ئاوارەبوون، وەزارەتی بەرگریی تایلەندیش کوژرانی نۆ سەربازی پشتڕاست دەکاتەوە.

زانیاریی بەدەستهاتوو: وەزارەتی بەرگریی تایلەند ئەمڕۆ پێنجشەممە ڕایگەیاند، لەم هەفتەیەدا نۆ سەربازی تایلەند لە پێکدادانە سنوورییەکان لەگەڵ کەمبۆدیا کوژراون، هاوکات لەگەڵ کوژرانی سێ کەسی سیڤیل، برینداربوونی 120 کەسی دیکە.

ئەوەی لەبارەیەوە دەگوترێت: لە دوای سەرهەڵدانی پێکدادانەکانی نێوان کەمبۆدیا و تایلەند، دۆناڵد ترەمپ، سەرۆکی ئەمریکا ئاشکرای کردووە کە پەیوەندییەکی تەلەفۆنی لەگەڵ سەرکردەکانی هەردوو وڵات دەکات چونکە بە هەوڵەکانی ئەمریکا لە مانگی تەممووز ئاگربەست لەنێوان هەردوو وڵات ڕاگەیێنرا، ترەمپیش متمانەی خۆی دەربڕی کە جارێکی تر دەتوانێت هەردوولا ڕازی بکات کە شەڕەکە ڕابگرن.