لێقەوماوێکی چەمچەماڵ: لافاو 22 سەر ئاژەڵ و هەموو ماڵەکەمی برد ئێستا ماڵ و مەعیشەتم نەماوە

ئاڤا نیوز

چیرۆکە ناخهەژێنەکانی لافاوەکەی چەمچەماڵ کۆتاییان نایەت، هەرچەندە پەیامنێرانی ئاڤا بە نێو لێقەوماواندا دەگەڕێن بۆ ئەوەی دەنگیان بگەیێنن، چیرۆکی خەمناکتر دەدۆزنەوە. 

چیرۆکی سەرەکی: دایکێک لە چەمچەماڵ، لەبەر نەداری و هەژاریی ماڵی کوڕەکەی هێناوەتە لای خۆی و دوو خێزان پێکەوە دەژیان، بەڵام لافاو ڕەحمی پێ نەکردن. دایکەکە لە ناو قوڕ و چڵپاوی پاشماوەی ماڵەکەی نەیدەتوانی فرمێسکی چاوەکانی ڕابگرێت و دەیوت: هیچمان نەماوە، کەس لێمان ناپرسێتەوە.

زیانە سەرەکییەکان: ژیوار عەبدولڕەحمان، پەیامنێری ئاڤا سەردانی ماڵەکەی کرد، دایکەکە داوای کرد خێرخوازان فریایان بکەون، جلوبەرگ، خواردن، ڕاخەر، گەرمکەرەوە و ئامێرەکانی تر هیچیان نەماوە و لەوەتەی بارانەکەیە هەر شەوێک و لە ماڵێکی تردا ڕۆژ دەکەنەوە. وتیشی: "ئەوەش وەزعەکەمانە و بە چاوی خۆتان بیبینن". دایکەکە وتی: ژیانی ئێمە لەسەر بەخێوکردنی ئەو ماڵات و ئاژەڵانە بوو کە ئاوەکە بردوێتی.

 

ژیوار عەبدولڕەحمان، چەرخێکی بەدەستەوە گرتبوو دەیوت: تەنانەت ئەم چەرخەشیان بۆ دەرنەچووە و ماڵە دراوسێکانیان چەرخێک و گەرمکەرەوە -زۆپا-یان بۆ هێناون بۆ ئەوەی خۆیان گەرم بکەنەوە، ئەوەش لەکاتێکدا ماڵە دراوسێکەشیان هەر زیانیان پێگەیشتووە.

 

دواتر ژیوار عەبدولڕەحمان سەردانی شوێنی بەخێوکردنی ئاژەڵەکانی ئەو ماڵەی کرد و خاوەنی ماڵەکە وتی: جاران ژیانم باش بوو، من هاوکاریی خەڵکم دەکرد، ئێستا ماڵەکەم هیچی تیا نەماوە، لە 27 سەر ئاژەڵ و ماڵات کە بژێویی دابین دەکردم و خۆم و خێزانەکەم پێوەی سەرقاڵ بوین، ئێستا تەنها 5 سەر ماڵات ماون.

 

داواکاریی خێزانەکە: حکومەت باوکی میللەتە، ئەگەر هاوکاریمان بکات، ماڵی ئاوا بێت و ئەگەر نەشیکات، چی بکەین؟! دەسەڵاتمان نییە و هەر ماڵی ئاوا بێت.

خاوەن ماڵەکە بە پەیامنێری ئاڤا میدیای وت: مادەم ئێوە ئامادەبوون لەو دوورەوە بێن بۆ ناو ئەم قوڕاوە و بەسەرمان بکەنەوە، سوپاستان دەکەین و وا دەزانم هەموو شتێکتان کردووە بۆمان، سێ ڕۆژە کەس بەسەری نەکردووینەتەوە و لێمان ناپرسێتەوە.

کاریگەری و لێکەوتەکان: خاوەن ماڵەکە وتی، دوێنێ شەو دانیشتبووم بە دیار پەخشی ئاڤاوە و تەماشای حاڵی ئەو خەڵکەی خۆمانم ئەکرد، سەرباری وەزعی خۆم بۆ ئەو خەڵکە ئەگریام.

 

چارەسەرەکان: ئاڤا میدیا کامپەینێکی گەورەی بۆ هاوکاریکردنی لێقەوماوانی لافاوەکەی سنووری چەمچەماڵ ڕاگەیاندووە. سەرمایەداران و خێرخوازان بە پارە و خۆراک و کەلوپەلی ناوماڵ بەشداری لە کامپەینەکەدا دەکەن.

پەیامنێری ئاڤا میدیا مژدەی ئەوەی بەخشیە ماڵە لێقەوماوەکە کە لە کامپینی ئاڤا ئەو ماڵە و دەیان و سەدان ماڵی دیکەی لێقەوماو بەسەردەکرێنەوە و هاوکاری دەکرێن. 

ئەوەی پێویستە بیزانیت: خێرخوازان، سەرمایەداران، وەبەرهێنەران چین و توێژە جیاوازەکان، دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:

ژمارەی پەیوەندی؛

07701718885 - 07508035020

 - لەڕێگەی کیو ئاڕ کۆدی (FIB)

• گەیاندنی هاوکاری بە ئۆفیسی سەرەکی ئاڤا میدیا لەسەر ڕێگای سەرەکی هەولێر - پیرمام، پشت فیردەوس سیتی.