چیرۆکی خێزانێک لە چەمچەماڵ دڵ دەکات بە ئاو: دەتریسن مناڵەکانمان ڕەق ببنەوە

ئاڤا نیوز

 

چیرۆکە تراژیدییەکانی ڕووداوی لافاوەکەی چەمچەماڵ کۆتاییان نایەت، تیمەکانی ئاڤا لەناو کوچە و کۆڵانەکانی ناحیەکانی شۆڕش و تەکیە و سەنتەری قەزای چەمچەماڵ بەردەوامن لە گێڕانەوەی ئەو چیرۆکانە و لەڕێگەی کامپەینی ئاڤاوە هاوکاری مرۆیی خێزانە زیان لێکەوتووەکان دەکرێت.

 

وێنە گەورەکە: شەوی ڕابردوو ئاڤا میدیا لە بەردەم ئۆفیسی سەرەکی لە هەولێر، کامپەینێکی گەورەی هاوکاری بۆ زیان لێکەوتووانی لافاوەکەی چەمچەماڵ ڕاگەیاندووە، چەندین خێمە بۆ کۆکردنەوەیان دانراون و دوو ڕۆژی دیکە بەردەوام دەبێت، سەدان خێرخواز لە پیاو و ئافرەت، منداڵ و پیر، پارە و پێداویستییەکانی ژیانی ڕۆژانەیان هێناوە، سەدان ئۆتۆمبێل لە نۆرەدان بۆ هێنانی هاوکارییە جۆرا و جۆرەکان.

 

لێدوانی فەرمی: پەیامنێری ئاڤا، ژیوار عەبدولڕەحمان، لەکاتی پەخشی ڕاستەخۆ چووە یەکێک لە ماڵە زیان لێکەوتووەکان لە چەمچەماڵ، ئافرەتێک بە چاوی پڕ لە فرمێسکەوە باسی کارەساتەکەی ڕۆژی لافاوەکەی کرد و گوتی: ماڵەکەم بەر لافاوەکە کەوتووە و  لەو ڕۆژەوە ئاگر لەماڵەکەم نەکراوەتەو و خۆم و منداڵەکان دۆخمان زۆر خراپە و تەنیا چوار مەنجەڵ و سێ پایەک و چەند کەوچک و قاپێکمان بۆ دەرچووە، بەڵام هیچ شتێک نییە بۆ ئێوارە بیخۆین و دەبێت چاوەڕیی خێرخوازان بکەین خواردنمان بۆ بێنن. 

 

ئافرەتەکە بە جلە تەڕەکانییەوە و بە لەرزینەوە درێژەی بە قسەکانی دا گوتی: زۆر سەرمامانە جلوبەرگمان بۆ بێنن ئەمشەو منداڵەکانم ڕەق دەبنەوە.

 

کاردانەوەکان: ئاڤا میدیا دڵنیایی دا بەو خێزانە یەکێک دەبێت لەو ماڵانە لەڕێگەی ئاڤاوە هاوکاری دەکرێت.

 

ئەوەی پێشبینی دەکرێت: بەپێی پێشبینییەکانی کەشوهەوا، ئەمشەو سەرمایەکی زۆر ڕوو لە ناوچەکە دەکات و ئەگەری بەفربارین لە چەندین ناوچەی شاخاویی هەیە و دەبێتە هۆی زۆرتر دابەزینی پلەکانی گەرما، ئەوەش مەترسی لەسەر زیانلێکەوتووانی لافاوەکە زۆر زیاتر دەکات.

 

ئەمەش بزانە:  خێمەی ئاڤا سندووقێکی تایبەتی بۆ کۆکردنەوەی پارە داناوە و خێرخوازان دەتوانن بەکاش پارە بدەن.

خێرخوازان، سەرمایەداران، وەبەرهێنەران چین و توێژە جیاوازەکان، دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:

ژمارەی پەیوەندی؛

07701718885 - 07508035020

 - لەڕێگەی کیو ئاڕ کۆدی (FIB)

• گەیاندنی هاوکاری بە ئۆفیسی سەرەکی ئاڤا میدیا لەسەر ڕێگای سەرەکی هەولێر - پیرمام، تەنیش فیردەوس سیتی.