ئاڤا لە سەکۆیەکی میدیاییەوە، بۆ بنکەیەکی بەخشش و کۆمەک

لە چرکەساتێکی هەستیاردا کە ویژدانی تاک و کۆمەڵگەی تێدا ڕووبەڕووی تاقیکردنەوەیەکی یەکلاکەرەوە دەبێتەوە، ڕێگەی سەرەکی و لاوەکی و دەروازە و گۆڕەپانی کەناڵی ئاڤا میدیا بوو بە ناوەندێکی پڕ جووڵەو چالاکی بۆ بەخشین و هاوکاری. بە سەدان خێزان، ژن و پیاو و منداڵ، کاروانێکی کیلۆمەتریی ئۆتۆمبیل، لە هەموو لایەکی هەولێرەوە بەرەو بارەگای ئاڤا بەڕێکەوتوون ، هەندێکیان گەیشتوون و زۆربەیشیان بە سەبر و ڕێزەوە لە ڕیز و نۆرەدان بۆ گەیشتن بە ئاڤا.

ئەوانە هەزاران هاووڵاتیی سادەی بەخشندەن بەدەم بانگەوازێکی ئاڤاوە هاتوون : (با هەمووان هاوکاریی خەڵکی لێقەوماوی لافاوەکەی چەمچەماڵ و شۆڕش و تەکێیە بکەین و باری گرانی زەرەر و زیانەکانیان کەمێک سووک بکەین).

ئەوەی لە دوێنێ شەوەوە لەبەردەم ئاڤادا ڕوودەدات تەنیا هەڵمەتێکی کۆمەکی دارایی و کەلوپەل نییە، بەڵکو بەرجەستەبوونێکی دەگمەنی ڕۆحی کوردەواری و کوردایەتییە بە دڵێکی پڕ حەسرەت و هاوخەمییەوە، بە زیانلێکەوتووان دەڵێت : خەمتان نەبێت بەتەنیا جێتان ناهێڵین ئەوەی هەمانە لەگەڵتاناندا بەشیدەکەین .

ژنێکی بەساڵاچوو بە جزدانێکی ڕەشی بچووکەوە لە ئۆتۆمبێلی کوڕەکەی دابەزی و گوتی: "هەر ئەوەندەم لە توانایە نیوەی مووچەی خانەنشینییەکەم ببەخشم و ئەوی تری حەب و دەرمانەکانمی پێ دەکڕم."

دوو گەنج سندووقی ئۆتۆمبیلەکەیان هەڵدایەوەو دوو باوەش بەتانی و دۆشەکیان داگرت و ڕوویان لە چادەرەکان کرد .

باوکێک دەستی خوشک و برایەکی منداڵی گرتبوو، یاری و جانتای قوتابخانەکانیان بە شانەوە بوو، ڕوویان لە چادرەکان کردووە بۆ بەخشینیان.

چەند پیاوێک و چەند ژنێک، ناو بەناو دەگەیشتنە ئاستی سندووقی کۆمەکە داراییەکەو بەبێ دوودڵی چی لە توانایاندا بوو ڕادەستی کارمەندانی دەستودڵ پاکی ئاڤایان کرد.

بێ ویژدانییە ئەوەی لە ناو گۆڕەپانی ئۆتۆمبیلەکانی ئاڤادا دەبیرێت تەنیا بە هەڵمەتێکی کۆمەک ناوببرێت. ئەوە ئاپۆرای هاودەنگی و هاو چارەنووسی و هاو دڵییە. ئەوەی لە وێنەکاندا دەبینرێت سەرلەنوێ پێناسەکردنەوەی واتای بەهاکانی کوردایەتی و مەردایەتییە.

کارمەندە گەنج و دەستودڵ پاکەکانی ئاڤا، خۆبەخشانە بێ ماندووبوون لە جووڵەدان: ڕێکخستن و ڕیزکردن و تۆمارکردن و بارکردنی بارهەڵگرەکان کە ڕاستەوخۆ بەرەو ناوچە کارەساتبارەکان دەجووڵێن.

ڕاستە لافاو دەتوانێ دار و دیوار و دەرگا و پەنجەرە داڕمێنێ، بەڵام هەرگیز ناتوانێ بونیادی کۆمەڵگەی کوردەواری لاواز و لەق بکات .

ئاڤا میدیاش دەستپێشخەر و سەرکەوتوو بوو لەوەی زۆر زیاتر بێت لە تەنیا دەزگایەکی میدیایی، ئاڤا ئەمڕۆ بووەتە پرد و ڕایەڵەی نێوان ئازار و بەهاناوەچوون. ئاڤا خۆڕسکانە دەستپێشخەریی کرد و بوو بە خۆری هیوا و ژیانەوە.