ساڤایا: بەرهەم ساڵح جێگەی شانازییە بۆ عێراق

ئاڤا نیوز

 

مارک ساڤایا، سوپاسی سکرتێری گشتیی نەتەوە یەکگرتووەکان دەکات بۆ پشتیوانیکردنی بەرهەم ساڵح وەک سەرۆکی کۆمیسیۆنی باڵای کاروباری پەنابەران و دەڵێت: "ئەم بڕیارە نیشانەی ڕێزلێنانی نێودەوڵەتییە بۆ کەسایەتییەکی خاوەن ئەزموون".

 

چیرۆکی سەرەکی: بەرهەم ساڵح، سەرۆککۆماری پێشووی عێراق، لە کێبڕکێیەکدا لەگەڵ 12 کەسایەتیی نێودەوڵەتی، سەرکەوتنی بەدەست هێنا و بە فەرمی بۆ پۆستی "کۆمیسیاری باڵای نەتەوە یەکگرتووەکان بۆ کاروباری پەنابەران" دەستنیشان کرا.

 

ڕاگەیێنراوی فەرمی: مارک ساڤایا، نێردەی تایبەتی ئەمریکا بۆ کاروباری عێراق، لە ئەژماری تایبەتی خۆی لە تۆڕی کۆمەڵایەتی ئێکس ڕایگەیاند: بەرهەم ساڵح توانای هەیە گۆڕانکاری لە دۆسیە مرۆییەکانی تایبەت بە پەنابەران لە جیهاندا بکات، بەتایبەتی کە خۆی لە قۆناغەکانی پێشووی ژیانیدا، ئەزموونی پەنابەرێتیی هەبووە.

 

زانیاری زیاتر: ساڤایا ئاماژەی بەوەشدا، دەستنیشانکردنی بەرهەم ساڵح بۆ ئەو پۆستە باڵایە، ساتێکی مێژوویی و جێگەی شانازییە بۆ عێراق و گەلەکەی.

 

ئەمەش بزانە: لەگەڵ بڵاوکردنەوەی نووسینەکەدا، ساڤایا وێنەیەکی خۆی و بەرهەم ساڵحی بڵاوکردووەتەوە و بە "هاوڕێ"ی خۆی دەیناسێنێت.