لێقەوماوێکی لافاوەکەی چەمچەماڵ بەچاوی پڕ فرمێسکەوە: ئەم جلوبەرگەی لەبەرماندایە هی خەڵکە

ئاڤا نیوز

 

ژنێک کە تاقانەی ئەنفالە و ماڵیان لە ناحیەی شۆڕشە، ئاماژە بەوە دەکات کە جێکەوتەی ماڵەکەیان بەشێوەیەکە زۆرینەی جارەکان لافاو هاتووەتە ماڵەکەی، هەر بۆیە ئەمجارە هیچیان بۆ دەرنەچووە و تەنها فریای ئەوە کەوتوون لە سەربانی دراوسێکانیانەوە خۆیان دەرباز بکەن.

 

چیرۆکی سەرەکی: ژنەکە تاقانەی ئەنفالە و بەهۆی ئەنفالکردنی دایک و باوکییەوە تا ئێستا بەیان ولادە – بڕوانامەی لەدایکبوونی بۆ دەرنەهێنراوە و کێشە و گرفتی یاسایی لە ژیانی رۆژانەیدا زۆرە، سەرباری ئەوەش لافاو هەموو ماڵەکەی وێران کردووە.

 

زیانە سەرەکییەکان: تاقانەکەی ئەنفال وتی، هەموو گەڕەکەکە دەمانناسن و دەزانن وەزعمان چۆنە، خەڵک هاوکاریمان دەکات، ئەم جلوبەرگەی لەبەرماندایە خێرخواز بۆی هێناوین و هیچمان بۆ دەرنەچووە، چونکە لە زێراب و دەرگای کۆڵانەوە ئاو گەڕایەوە بۆ ناوماڵمان.

 

ژنەکە بە چاوی پر لە فرمێسکەوە، باسی کاتی لافاوەکەی کرد و وتی، کاتێک زانیمان بارانی زۆر دەبارێت، فریای ئەوە کەوتبووین منداڵەکانمان بردبوو بۆ ماڵی کەسوکارمان، بەڵام خۆمان زۆر بە زەحمەت دەربازمان بوو، چونکە خانووەکەمان چاڵە و زێرابی کۆڵان بەرزترە لەئاستی ماڵەکەمان.

 

داواکاریی خێزانەکە: داوا کاربوون کێشە قانوونی و پێداویستییە سەرەکییەکانی ژیانیان بۆ چارەسەر بکرێت و خێرخوازان و لایەنی فەرمی هاوکارییان پێشکەش بکەن، چونکە خۆیان جارێکی تر ماڵەکەیان چاک بکەنەوە.

 

ئەوەش بزانە: هاوسەری ئەو تاقانەیەی ئەنفال، فەرمانبەری تەندروستییە و بەو گوزەرانە خراپەوە هاتوچۆ دەکات بۆ نەخۆشخانەیەک لە پێنجوێن و وەکو خۆی ئاماژەی پێکرد، ئەگەر مووچە بدرێت، نیوەی مووچەکەیان بۆ هاتوچۆی شوێنی کارەکەی خەرج دەکات.

 

چارەسەر: هەر لەکاتی پەخشی راستەوخۆدا، ساڤۆ محەممەد، پێشکەشکاری ئاڤا میدیا ئەو مژدەیەی پێدا کە پزیشکێک لەشاری سلێمانییەوە ئەرکی ئەوەی گرتووەتە ئەستۆ کە بڕی پێنج ملیۆن دیناری پێ ببەخشێت وەکو هاوکارییەک.

 

باکگراوند: ناحیەی شۆڕش لە سەروەختی جێبەجێکردنی پرۆسەی ئەنفال 1987 لەلایەن حیزبی بەعسەوە وەکو کۆمەڵگەیەکی نیشتەجێبوونی زۆرەملێ بونیادنرا، دواتریش کەسوکاری ئەنفالکراوەکانیان تێدا نیشتەجێکرد،  ئاستی گوزەران و ژیانی خەڵکەکەی لە دۆخێکی خراپدایە و پێویستیان بە زۆرترین هاوکاریی و بەدەمەوەبوون هەیە.

 

بۆ کۆمەککردن:  ئاڤا میدیا کامپەینێکی گەورەی بۆ کۆکردنەوەی هاوکاری بۆ لێقەوماوانی لافاوەکەی چەمچەماڵ و دەوروبەری ڕاگەیاندووە. 

خێرخوازان، سەرمایەداران، وەبەرهێنەران چین و توێژە جیاوازەکان، دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:

پەیوەندی بکەن بەم ژمارانە؛

07701718885 

07508035020

 

 - ناردنی پارە لەڕێگەی کیو ئاڕ کۆدی (FIB)

گەیاندنی هاوکاری بە ئۆفیسی سەرەکی ئاڤا میدیا لە ڕێگای سەرەکی هەولێر - پیرمام، پشت فیردەوس سیتی.