هێزێکی ئەمریکا هەڵدەکوتێتە سەر کەشتییەک کە لە چینەوە بەرەو ئێران دەڕۆشت

ئاڤا نیوز

 

ڕۆژنامەیەکی ئەمریکی ئاشکرای دەکات هێزەکانی ئەمریکا مانگی ڕابردوو هەڵیانکوتاوەتە سەر کەشتییەک و دەستیان بەسەر بڕێک کەرەستەی سەربازی گرتووە کە لە چینەوە بەرەو ئێران دەڕۆیشت.

 

زانیاریی بەدەستهاتوو: ڕۆژنامەی وۆڵ ستریت جۆرناڵی ئەمریکی، بە پشتبەستن بە بەرپرسانی ئەمریکا ئاشکرای کردووە، ''مانگی ڕابردوو تیمێکی هێزە تایبەتەکانی ئەمریکا لە زەریای هیندی هەڵیانکوتاوەتە سەر کەشتییەک و دەستیان بەسەر بڕێک کەرەستەی سەربازیدا گرتووە کە لە چینەوە بەرەو ئێران دەچوو''.

 

بۆچی گرنگە: ئەمە یەکەمجارە لە ماوەی ساڵانی ڕابردوودا سوپای ئەمریکا دەست بەسەر کەشتییەکدا بگرێت کە لە چینەوە بەرەو ئێران بچێت و کەرەستەی سەربازی تێدابێت.

 

ڕۆژنامەکە دەڵێت کەشتییەکە چەند بارێکی کەرەستەی سەربازی هەڵگرتبوو کە دەتوانرا لە دروستکردنی چەکی ئاسایی ئێراندا بەکاربهێنرێت.

 

ئەمەش بزانە: دوای دەستبەسەرداگرتنی کەرەستە قەدەغەکراوەکان، تیمەکە ڕێگەیان داوە کەشتییەکە لە گەشتەکەی بەردەوام بێت.