ژنێک لە چەمچەماڵ: سێ رۆژە خواردن لە ماڵەکەمدا لێنەنراوە و ژیانمان نەماوە

ئاڤا نیوز

 

ژنێک لە چەمچەماڵ، چیرۆکی ڕۆژی لافاوەکە بۆ ژیوار عەبدولڕەحمان، پەیامنێری ئاڤا دەگێڕێتەوە و دەڵیت، باوکی منداڵەکان کارگوزارە و شەقامەکانی پاکدەکردەوە و منیش نان بۆ ماڵان دەکەم و دوور بووم لە منداڵەکان کە لافاوە ڕوویدا، خەمی منداڵەکانم بوو کە زانیم لافاو گەیشتووەتە ماڵەکەمان، هەرچیم دەکرد لافاوەکە زۆر بەهێزبوو نەمدەتوانی بگەڕێمەوە و خەڵک نەیدەهێشت هەوڵی پەڕینەوە بدەم.

 

چیرۆکی سەرەکی: ڕۆژی 9-12-2025، بارانبارینێکی تووند ڕووی لە ناوچە جیاوازەکانی هەرێمی کوردستان کرد، بەهۆیەوە لە سنووری قەزای چەمچەماڵ لافاو دروستبوو، سەرەڕای زیانی گیانی، بەهۆیەوە سەدان ماڵ بە تەواوی کەلوپەلەکانیان لەدەستدا، سەدان دوکان زیانیان پێگەیشت و چەندین فەرمانگەی حکومیش زیانیان پێگەیشت.

 

زیانە سەرەکییەکان: ئەم ژنە ئاماژە بەوە دەکات کە لەبەر خراپی دۆخی گوزەرانیان جارێکی دیکە زۆر سەختە بتوانن ئەو کەلوپەل و پێداویستییانەی لەدەستیانداوە دابینی بکەنەوە، ئەگەر خێرخوازان هاوکارییان نەکەن.

 

وەکو خۆی ئاماژەی پێکرد، لە ماڵەکەیدا تەنها موجەمیدە- بەفرگری ماڵەکەیان کاردەکات و وەستا چاکی کردووەتەوە بۆیان، ئەگینا سەرجەم پۆشاک، خۆراک و ڕاخەر و پێداویستییەکانی دیکەی ماڵەکەیان لەناوچوون.

 

ڕۆژی لافاوەکە: من و مێردەکەم لە سەعات 7:00ی بەیانیەوە چووبوین بۆ ئیش، مۆبایلیشم پێ نەبوو، کاتێک لافاوەکە هاتبوو، گیانمان بەوە بوو کوڕە گەورەکەم منداڵەکانی دەربارز کردبوو بۆ سەربان و هەموو ماڵەکەم لافاو لەناوی بردووە و هیچمان بۆ دەرنەچووە.

 

داواکاریی خێزانەکە: مادەم منداڵەکانم زیندوون سوپاسی خودا ئەکەم، ماڵ و حاڵەکەم بەوشێوەیەیە کە دەیبینن، سێ رۆژە خواردنم لە ماڵەکەمدا دروست نەکردووە و هەر رۆژێک لە ماڵی خزم و کەسوکارێکمانین و سەرگەردان بووین.