دەوڵەت باخچەلی گڵۆپی سەوز بۆ ڕەخساندنی "زەمینەسازیی یاسایی" بۆ پڕۆسەی ئاشتی هەڵ دەکات

ئاڤا نیوز

 

پەروین بوڵدان، ڕایگەیاند گەیشتوونەتە "قۆناغی دووەم"ـی پڕۆسەی ئاشتی، کە بریتییە لە ڕەخساندنی زەمینەسازیی یاسایی، هەموارکردنەوەی یاساکان و دەرکردنی یاسای ئاشتی؛ سەرۆکی گشتیی مەهەپە بە ئاشکرا پشتیوانیی خۆی بۆ قسەکانی دەربڕی و دەڵێت: لەگەڵ یەک بە یەکی قسەکانیدام.

 

وێنە گەورەکە: لە پەیامەکەی 27ی شوباتدا، عەبدوڵڵا ئۆجەلان داوای لە پەکەکە کرد چەک دابنێت، بەڵام وەک مەرجێک داوای لە تورکیاش کرد "زەمینەسازیی یاسایی" بۆ ئەمە بڕەخسێنێت؛ ئێستا هەوڵەکان بۆ ئەم مەبەستە چڕ کراونەتەوە.

 

لێدوانی فەرمی: پەروین بوڵدان، ئەندامی شاندی ئیمڕاڵی ڕایگەیاند لە کۆبوونەوەکەیان لەگەڵ دەوڵەت باخچەلی، سەرۆکی گشتیی مەهەپە تاوتوێی دوایین پێشهاتەکانی پڕۆسەی ئاشتی کراوە و باخچەلی لە ناوەڕۆکی دوایین کۆبوونەوەی شاندەکە لەگەڵ ئۆجەلان ئاگادار کراوەتەوە.

 

پێویستە ئەمەش بزانیت: تەنیا یەک ڕۆژ بەر لەم کۆبوونەوەیە، فەتی یڵدز، جێگری سەرۆکی گشتیی مەهەپە مەرجێکی قورسی دانا و ڕەخساندنی زەمینەسازیی یاسایی بەستەوە بە "خۆهەڵوەشاندنەوەی تەواوەتیی پەکەکە" و ڕایگەیاند ئەمە دەبێت هێزەکانی سووریای دیموکرات- هەسەدەش بگرێتەوە.

 

لەلایەکی دیکەوە: ئەم پێشهاتانە لە کاتێکدان، سێ ڕۆژ لەمەوبەر دەم پارتی و جەهەپە، و پێرێش مەهەپە ڕاپۆرتی خۆیان لەبارەی پڕۆسەی ئاشتی پێشکەشی سەرۆکایەتیی پەرلەمان کرد؛ چاوەڕوان دەکرێت لەم چەند ڕۆژەدا ئاک پارتیش ڕاپۆرتی خۆی پێشکەش بکات.