42 كۆچبەری دیكە لە لیبیاوە دەگەڕێنرێنەوە هەرێمی كوردستان

ئاڤا نیوز

 

ژمارەیەك كۆچبەری هەرێمی كوردستان لە لیبیا ڕادەستی باڵیۆزخانەی عێراق لەو وڵاتە كراونەتەوە و بەمزووانە دەگەڕێنرێنەوە هەرێمی كوردستان.

 

چیرۆکی سەرەکی: 42 كۆچبەری كورد، كە زۆربەیان خەڵكی سنووری ئیدارەی سەربەخۆی ڕاپەڕینـن، هەوڵیانداوە بەقاچاخ لە لیبیاوە خۆیان بگەیێننە كەناراوەكانی ئیتاڵیا، بەڵام هەرزوو لەلایەن پۆلیسی كەناراوەكانی لیبیا دەستگیر دەكرێن.

 

لێدوانی فەرمی: ڕەنج پشدەری، چالاكوانی بواری كۆچبەران بە ئاڤای ڕاگەیاند، ئەو 42 كۆچبەرە، زۆربەی زۆریان خەڵكی ڕانیە و قەڵادزێن لە ئیدارەی سەربەخۆی ڕاپەڕین و دوای دەستگیركردنیان لەلایەن دەزگا ئەمنییەكانی لیبیا، ڕادەستی باڵیۆزخانەی عێراق لەو وڵاتە كراونەتەوە و بڕیاریشە بەمزووانە ڕەوانەی هەرێمی كوردستان بكرێنەوە.

 

زانیاریی بەدەستهاتوو: ئاڤا زانیویەتی چەند پەرلەمانتارێكی ئەنجوومەنی نوێنەرانی عێراق، بۆ گەڕاندنەوەی ئەو كۆچبەرانە لەگەڵ د. ئەحمەد سەحاف، هەڵسووڕێنەری كاروبارەكانی باڵیۆزخانەی عێراق لە لیبیا لەسەر هێڵن و پێیان ڕاگەیێنراوە كە ئێستا كۆچبەرەكان سەلامەتن و لە شوێنێكی ئارام و دڵنیادان.