جادووگەرێک و کچەکەی لە ئەورووپا بە "فێڵ" 11 ملیۆن دۆلار لە 19 ژنە دەوڵەمەند دەکێشنەوە

ئاڤا نیوز

 

ماوەی 10 ساڵە جادووگەرێک و کچەکەی بە کۆڵانە دەوڵەمەندەکانی ئەڵمانیا و نەمسا دەگەڕێن؛ بە پاساوی ئەوەی "زێڕەکانیان شووم و قێزەونن"، 11 ملیۆن دۆلاریان لە 19 ژن کێشاوەتەوە و ئێستاش دیار نەماون.

 

چیرۆکی سەرەکی: ماریانا میایلۆڤیج تەمەن 44 ساڵ و ئانای کچی تەمەن 19 ساڵ، لە شارەکانی میونخ و ڤیەننا چوونەتە چەندین ماڵە دەوڵەمەند. ژنە دەوڵەمەندەکانیان بەوە قایل کردووە خشڵە گرانبەهاکانیان "ڕۆحی قێزەون"یان هەڵگرتووە و دەبێت لە "ڕێوڕەسمێکی تایبەت"دا پاک بکرێنەوە. دوای وەرگرتنی خشڵەکان و پارەیەکی زۆر وەک حەقدەستی کارەکە، ژمارەی مۆبایلەکەیان داخستووە.

 

ئەم جادووگەرانە بۆ ناچارکردنی قوربانییەکان پەنایان بۆ گوشاری دەروونی بردووە؛ بە ژنە دەوڵەمەندەکانیان گوتووە ئەگەر ڕازی نەبن زێڕەکان لای ئەوان پاک بکەنەوە، ئەوا خۆشەویست و کەسوکاره نزیکەکانیان تووشی نەخۆشیی کوشندە دەبن و دەمرن.

 

ژمارەکان وا دەڵێن: بەپێی ڕۆژنامەی تەلەگراف، ئەم دایک و کچە بەم شێوازە 11 ملیۆن دۆلاریان کۆکردووەتەوە. تەنها لە یەکێک لە دۆسیەکاندا بە پاساوی ئەوەی "جن دەستی لێ وەشاندووە" 673 هەزار دۆلاریان لە ژنێک وەرگرتووە؛ هەروەها 65 هەزار دۆلاریان لە ژنێکی تووشبووی شێرپەنجە وەرگرتووە و بەڵێنیان پێی داوە چاکی دەکەنەوە، بەڵام دواتر ژنەکە گیانی لەدەست داوە. 

 

لەلایەکی دیکەوە: تیمەکانی پۆلیس هەڵیان کوتاوەتە سەر ماڵی ماریانا لە ڤیەننا؛ لەوێ 25 کیلۆ قاڵبی زێڕ، چەندین کاتژمێر و ئەڵقە و ئەنگوستیلە، بڕێکی زۆر دۆلاری ئەمەریکی و پارەی سویسڕی و 14 ئۆتۆمبێلیان دۆزیوەتەوە. لە ئۆپەراسیۆنەکەدا هاوسەر و کوڕە تەمەن 29 ساڵەکەی ماریانا دەستگیر کراون، بەڵام هێشتا خۆی و کچەکەی نەدۆزراونەتەوە.