نوێنەری گۆتێرێس: یۆنامی لە کۆتایی ئەمساڵ کۆتایی بەکارەکانی دەهێنێت

ئاڤا نیوز

نوێنەری تایبەتی سکرتێری گشتیی نەتەوەیەکگرتووەکان و سەرۆکی نێردەی نەتەوەیەکگرتووەکان بۆ هاریکاریکردنی عێراق (یۆنامی) ڕایدەگەیێنێت، نێردەکە لە 31ی کانوونی یەکەمی 2025 بە یەکجاری عێراق جێدەهێڵێت، ئەمەش بەهۆی ئەوەی کە فیکری تیرۆریستیی وێرانکاریی عێراق چیتر مەترسی نییە.

ئەوەی پێویستە بیزانیت: بەگوێرەی بڕیاری ئەنجوومەنی ئاساییشی نەتەوە یەکگرتووەکان، ئەرکی تیمی نەتەوە یەکگرتووەکان بۆ یارمەتیدانی عێراق (یۆنامی) لەکۆتایی ئەمساڵدا تەواودەبێت و هەموو کارەکانی یۆنامی ڕادەگیرێن.

لێدوانی فەرمی: محەممەد ئەلحەسسان لە چاوپێکەوتنێکیدا لەگەڵ "هەواڵەکانی نەتەوە یەکگرتووەکان" ئاماژەی بەوەدا، کۆتاییهاتنی کارەکانی نێردەکە وەڵامدانەوەی خواستەکانی حکومەتی عێراقە، کە پێی وایە نێردەکە ئەرکە سەرەکییەکانی خۆی تەواو کردووە و کاتی ئەوە هاتووە "عێراقییەکان خۆیان دەست بەسەر کاروباری خۆیاندا بگرن."

ئەوەی ئێستا ڕوودەدات: ئەلحەسسان دووپاتی کردەوە کە چوونەدەرەوەی نێردەکە بە مانای نەبوونی نەتەوە یەکگرتووەکان نییە لە عێراق، بەڵکو دەزگا تایبەتمەندەکانیان چالاک دەمێننەوە لە بوارەکانی تەندروستی، پەروەردە، تەکنەلۆجیا، کەشوهەوا، و ئابووریدا.

لەلایەکی دیکەوە: ئەلحەسسان سەرنجی خستە سەر بوونی گەمارۆ نێودەوڵەتییەکان کە هێشتا کاریگەرییان لەسەر کەرتی بانکیی عێراق هەیە و جەختی لە پێویستیی لابردنیان کردەوە بۆ ئەوەی عێراق بتوانێت بچێتە قۆناغی گەشەپێدانی ئابووریی بەردەوام. هەروەها جەختی لە گرنگیی چەسپاندنی پرەنسیپی هاووڵاتیبوون و یەکسانی لە نێوان پێکهاتەکانی گەلی عێراقدا کردەوە و داوای کۆتاییهێنان بە تائیفەگەری و گەڕانەوەی ئاوارەکان، بەتایبەت ئێزیدییەکان، بۆ ناوچەکانی خۆیان کرد.

پەیامی فەرمی: ئەلحەسسان ستایشی ڕۆڵی ژنانی عێراقی کرد و بە "بەهێزترین ژنانی جیهان" وەسفی کردن و ئاماژەی بەوەدا کە خۆڕاگریی کۆمەڵگای عێراق لە سەختترین کاتەکاندا بەهۆی ئەوانەوە بووە. داوای پێشینەیی دانان بۆ مافەکانیان لە قۆناغی داهاتوودا کرد و متمانەی خۆی بەوە دەربڕی کە سەرکردایەتیی عێراق بڕوای بەم ڕێڕەوە هەیە.